Shah kem 2 ngut ki dkhot ka HNLC ba dawa pisa na ki nongkhaii

Ki bor pulit ka Ri Bhoi District, hadien ka jingtohkit bad ka jingbuddien kaba bniah halor ka jingdon jong ki katto katne ngut ki briew kiba donkti bad ka seng Hynniewtrep National Liberation Council (HNLC), kiba leh ia ki kam pyntriem bad ban dawa pisa ha ka kyrteng ka seng, ki la pulit ki la lah ban pynpulom noh ia ka jingthmu dawa pisa da kaba kem noh ia ar ngut ki dkhot jong ka HNLC. Kitei ki dkhot ka HNLC ba la shah kem ha ki pulit la tip kyrteng kum u Pyndapbok Makri bad u Lari Pynkmen Nongshli. Katkum ka jingiathuh da u Superintendent of Police ka Ri Bhoi District u VS Rathore, u la pyntip ba ki pulit ki la ioh jingtip halor ka jingdonkti jong ki dkhot ka HNLC (Over Ground Worker) ban leh ia ki kam pyntriem kum ka jingdawa pisa na ki nongkhaii ne ki nongtrei sorkar ha kylleng ka jylla, kumta ki pulit ki la peitngor halor kane ka jingdonkti jong kitei ki briew ka HNLC.

La iathuh ruh, ba ha ka jingpeitngor bad ka jingkhynra lehnoh ki pulit ha ka 2 tarik Jymmang kinpulit ki la ioh ban kem shwa ia u Pyndapbok Makri na Lad Quinine Ri Bhoi District, u ba dang thmu ban shim ia ka pisa kaba la dawa bad la lah ban pynpulom noh ia ka jingthmu lum pisa jong ka HNLC. U Rathore u la pyntip ruh, ba ha ka jingtohkit ki pulit ki la ioh pat ban kem sa ia u Lari Pynkmen Nongshli na Umtyra da ka jingiarap ki pulit ka East Jaintia Hills District bad la pynngat ia kine baroh arngut ha ki kyndon ain. La pyntip ruh, ba ka kynhun HNLC kaba treikam na Bangladesh, ka ju donkti ban phah ia ki dkhot jong ka kiba don ha Meghalaya ban lum pisa bad ban leh ia ki kam pyntriem ha kaba ki ju phah ruh ia ki shithi dawa pisa lyngba ki whatsapp ban dawa pisa na ki nongkhaii bad nongtrei sorkar bad ban da byrngem byrsit ruh ia ki kumjuh ia ki bahaiing bahasem lada kim kohnguh ia ka jingdawa jong ka HNLC.

Bun ngut ki khynnah ba luilui ki shah pynngop ha ki briew ka HNLC ban leh ia ki kam bym hok bad kiba long pyrshah ia ka ain namar ba ki sngew ioh kamai heh khlem da pyrkhat pat ba lada ki shah kem, kin ngat ha ki jingpynsajia kiba tyngeh bad mad ruh ia ki jingjynjar katba ki dkhot ka HNLC ha Bangladesh ki im suk im sain.