Naduh ka thma 1971, khlem don thma shuh, la klet kumno ban iada: MK Sangma

U Joint Director ka Civil Defence & Joint Commandant General ka Home Guard u MK Sangma ula ong ba ka jingpynlong ia ka Mock Drill ka long kum ka jingpyrshang ne ban khmih bniah ia ka jingtreikam ki tiar ki tar hadien bun phew snem naduh ka thma 1971.

Haba kren hynne ka sngi sha ki lad pathai khubor u MK Sangma u la ong, “ La bun snem ngi khlem don thma shuh ha kaba ngi la klet kumno ban iada haba shah wan hiar thma na suin, la klet ia ki thliew khyndew, bad la klet ia kaei kaba la jia ha ka thma 1971. Namarkata kane ka Mock Drill ka long ruh shi bynta ban lap ia kano kano ka jingduna ka jingdkoh ha ka tnad Civil Defence haba wan kum kane ka jingjia.”

U Jt. Director ka Civil Defence ula ong ba hadien kane, kan don ruh ka jingleh mock drill kaba heh ha ka wat ka baar  ban pynsngewthuh, ban hikai ia ki paidbah ban iada ialade haba wan kano kano ka jingshah khyrwit. “Ha kane ka 2nd Phase Mock Drill, yn kynthup lang ia ki pulit, ki jaka ai jingsumar bad baroh ki nongshong shnong kin shim bynta,” ula ong. Ia kane ka mock drill la pynlong hadien ba ka sorkar India ka la bthah ia ki jylla ban pynlong ha ki 244 tylli ki district ha ka ri, hadien ba ka India ka la khyrwit ia ki ktem lehnoh kiba la pynrieh bad ai jingkyrshan ka Pakistan, kaba lah ban mih ka thma hapdeng kine ki ar tylli ki ri. Ka India ka la ther namding ia ki ktem lehnoh ka Pakistan hadien ba 26 ngut ki nongleitkai sha Pahalgam kila shah siat iap ha ki lehnoh dang shen.