Shah kem 3 ngut, kurup drok 49.44 gram bad kynja 2.047 kilo

Da ka jingiai bteng ban peitngor ia ki nongshalan drug ha ka them Ri Bhoi District, ki bor pulit ka Ri Bhoi District hynnin ka 6 tarik ki la ioh ban kem ia 3 ngut ki briew kiba donkti ban shalan mar dih pynbuaid ha ki ar tylli ki jaka ba la pynlong ia ka jingap pahara ha Nongpoh bad Byrnihat. Katkum ka jingiathuh da u Senior Superintendent of Police u VS Rathore, la ong, ba ki pulit kiba dang bteng ban iakhun ia ka thma pyrshah drug ha ka jingap pahara hynnin ka sngi ki la ioh ban kem ia u wei u briew ba na Barpeta Assam ha Nongpoh bad kurup kumba 49.44 gram u drok heroin ba shongdor kumba 3 lak tam katba ba Byrnihat ki la ioh ban kem ia ar ngut ki briew kiba na Iewmawlong hajan Nongpoh bad la ioh ban kurup ia u Ganja ba khia kumba 2.047 kilo.

La iathuh ruh, ba u briew ba na Barpeta ba la iohkem ha Nongpoh la tip kyrteng kum u Sirajul Haque (36) bad ki arngut ba la iohkem na Byrnihat ki kynthup ia u Franky Marsing (27) bad u Shan Sylliang (24) ba na Iewmawlong, Nongpoh. Ha kane ka jingtalasi ki pulit ia u Briew ba na Barpeta ha Umlyngkdait, Nongpoh la kurup ruh ia kawei ka scooty ML10C-4833, kawei ka mobile bad ka pla kaba la buh ia ki 5 tylli ki synduk ba la song ia u drug heroin. Ki pulit ki la register case ha Nongpoh Police Station katkum ka Nongpoh PS Case No. 83(08)2025 under sections 21(b)/27A/29 jong ka NDPS Act, bad ki dang pynlong ia ka jingtohkit. Ha kaba ia dei bad ka jingiohkem ia ki arngut ha ka jingkhynra ha Byrnihat, ki pulit ki la kurup ia kawei ka kali kaba don ia u number ML-10C-3646, kaba ki la pyndonkam ban rah ia u ganja ban supplai pat sha Chennai.

La rejister mukotduma ia kine ki ar ngut katkum ka Nongpoh PS Case No. 84(08)2025 under sections 20(b)(ii)(B)/27A/29 jong ka NDPS Act bad ka jingtohkit ka dang iaid ban lap ia ka jingiadei jong kine ki briew bad kiwei ki nongthied ne nongsapplai ganja.