Shah kem 4 ngut ki snar nongkhaii, kurup drok T. 4.4 klur

Ki pulit ka East Jaintia Hills District ryngkat ka kynhun jong ka Anti-Narcotics Task Force (ANTF), Meghalaya bad ki pulit ka East Jaintia Hills District hynne ka sngi, ki la ioh kurup ia u drok uba shongdor palat T. 4.4 klur bad la ioh kem ia saw ngut ki nongkhaii drok kiba shalan drok na kawei ka jylla sha kawei pat ka jylla. Ha ka jingkhynra ba pynlong ha Byndihati, ki pulit ki la iohkem ia uwei u nongsuplai drok uba la tip kyrteng kum u Isak L. Joute bad la ioh kurup ruh haduh 9 song ki synduk sabon kiba don 91.86 gram u drok. Ha kane kajuh ka sngi, kane ka kynhun ANTF ka la pynieng biang ia ka jaka talasi ha Umkiang Petrol Post kaba hap hapoh ka Lumshnong Police Station bad ioh kem ia lai ngut ki kynthei kiba khaii droks bad la ioh kurup haduh 961.33 gram u drok ba la song ha ki 80 tylli ki synduk sabon uba shongdor haduh T. 4 klur.

Kine ki lai ngut la tip kyrteng ka Kimnei 33 snem, Dimkhothing 47 snem bad Ngaiting 40 snem kiba dei na Khongjom, Tengnoupal, Manipur. Katkum ka kyrwoh khubor na u Superintendent of  Police ka East Jaintia Hills u Vikash Kumar, ha ka miet jong ka 16 tarik Nailar, ha ka por kumba 10 baje janmiet, ka kynhun pulit jong ka ANTF ki la ioh ia ka jingtip ba u Isak L. Joute un mih na Churachandpur, Manipur sha Shillong lyngba ka bos paidbah bad la suba ba u rah ia ki mar khaii beain. Mar ia ioh lum ia kane ka jingtip, ki pulit ka ANTF ryngkat ka jingiatreilang bad ki pulit ka Khliehriat Police ki la pynlong ia ka jingap shrip ha shnong Byndihati bad ha k por kumba 2:15 baje janmiet jong ka 17 tarik Nailar, 2025, ki pulit ki la bat ia ka bos kaba don ia u nombor kali B/R No AS-01-JC-4999 kaba iaid na Silchar sha Shillong.

Na kane ka bos, ki pulit kila iohkem ia u Isak L. Joute uba 26 snem ka rta uba dei u khun jong u Vanlalrout Joute na ka shnong Madanriting, Shillong, East Khasi Hills. Ia kane ka jingkhynra la pynlong katkum ka kyndon jong ka NDPS Act, bad ia kane ka kes la rejistar ha Khliehriat Police Station hapoh ka ain jong ka NDPS Act bad na ka liang ki pulit ki dang pyllong ia ka jingtohkit halor kane.