Shah kem u Finance Secretary ka KCP bad PWG na Byrnihat

Hadien ba la ioh jingtip ba tikna na ki bor syntiat ia ka jaka rieh uwei u dkhot ka kynhun kiengatiar na Manipur ha ka 21 tarik Iaiong, ki pulit Ri Bhoi District ki khynra ha ki thaiñ Nongthymmai, Byrnihat bad ioh kem ia utei lehnoh. Katkum ka jingpyntip na ki bor pulit ka Ri Bhoi District, lyngba u Superintendent of Police u VS Rathore la pyntip ki pulit ki la ioh kem uwei u ehrang ba la tip kyrteng kum u Khundongbam Herojit Meitei  ba bat kum u finance secretary ka kynhun lehnoh ka Kangleipak Communist Party (KCP) bad ka People’s War Group(PWG). Ka kyrwoh ka la iathuh ruh, ba u tei u snar ka kynhun kaikhlaw u dei uba donkti ban leh ia ki kam pyntriem, ki kam lute hapoh ka jylla Meghalaya bad kiwei ki jylla ba marjan bad mar ia ioh jingtip ba ba rieh ha kawei ka iingwai ha Nongthymmai Byrnihat, ki pulit ki khynra bad ioh kem ia u bad na ka met jong u la ioh kurup ia ki mobile phone bad kiwei ki tiar ba u pyndonkam ban leh ia ki kam pyntriem.

Ha ka jingtohkit ki pulit, la ong, ba u ne u ehrang u la phla ia ka jingdonkti bad ka kynhun kiengatiar ka KCP (PWG), bad ba u donkti ban pynioh pisa ia kane ka kynhun kiengatiar bad kaba la pynlong ia u ban riehtngen ha ka jaka khappud ka long ban lait na ka jingshah kem ha ki bor ka ain bad kiwei kiwei kiba dang thwet ia kiba donkti bad ki seng kiengatiar kiba donkti ban wanrah ia ka jingklumar bad ka jingbym shongsuk shongshngain ha ka jylla Manipur. Na ka liang ki pulit ki la pyntip ruh, ba la suba jur ba u ne u ehrang u la lah ban donkti ban leh kam beaiñ bad pyntriem bad ki kynhun kiengatiar na Myanmar bad Nepal. Ki pulit ki la register mukotduma ha Nongpoh Police Station.

U ne u ehrang u Khundongbam Herojit Meitei, u dei u ba la shah kem teng ha ki bor pulit ka Manipur ha u snem 2018 halor ka jingpyndonkam tiar siat beaiñ bad ha Dimapur halor ki kam khaii drug. Na ka liang ka tnat pulit ka Meghalaya, kan dang bteng ban treishitom ban peitngor ia kino kino ki briew ne kynhun kiba thmu ban leh ia ki kam pyntriem kiba long beaiñ pyrshah ia ka shongsuk shongshngain ka ri bad kito kiba shah kem kin ngat beit ha ka jingpynshitom kaba tyngeh, ong ka kyrwoh na u SP Ri Bhoi District.