Sahkut ki trok da ki spah ha Mawmaram, na ei ngin iaid, ong ki Nongniah

Hadien ba ka ophis jong ka Deputy Commissioner ka East Khasi Hills ka la pynmih ia ka hukum bym shah shuh ia ki trok kiba kit palat 9 ton ba kin iaid na ka surok na Mawmaram ban mih sha Nongthliew-Mawmih-Mawlyndep, ha ka miet jong ka 22 tarik u ïaïong 2025 da ki spah tylli ki trok kiba wan na ki thain South West, West bad Eastern West Khasi Hills District ki la shah bat ha Mawmaram.

Katkum ka jingiathuh jong ki nongniah trok la ong ba ki trok kiba la shah bat ha Mawmaram ki don kumba 200 tylli eiei. Kine ki nongniah ki la buh jingkylli ia ka sorkar ba lada kam shah ia ki ban iaid na kane ka lynti, naei pat kin iaid. Ki la pan jingshai ruh na ka sorkar ba ka lada ka khang ia kane ka lynti ka dei ban kdew da kawei pat ka lynti khnang ba ka jingbylla jong ki kan ym thut. Shuh shuh ki la ong lada kin iaid na Mawryngkneng kam don jingmut shuh ia ki ban bylla namarba kam mih shuh bad ha ka jaka ban ioh khaw khun poi sha ka duh khaw khun pynban.

Kum ban shu pynkynmaw ka ophis jong ka DC, ka la pynmih ia ka hukum ba ka jingbym shah shuh ia ki trok kiba kit palat 9 ton ban iaid na kane ka surok ka dei namarba kala wanrah ia ka jingjulor jong ki bynta jong ka surok bad kaba buh jingma ruh ia ki nongshong shnong ne ki nongleit nongwan namar ka jingrit ka jingheh jong ka surok. La pynjari ruh da ka Section 163 jong ka Bharatiya Nagarik Suraksha Sanhita bad kiba pynkhein ia kane ka hukum kin ngat ha ki kyndon ain kiba eh.