Shah kem u khynnah, phla ba iap jyllop i heprit Insaphira ba ur por ialehkai

U Superintendent of Police (SP) ka East Khasi Hills u Bah Vivek Syiem ula ïathuh ba katkum ka Post Mortem, la paw ba i heprit Insaphira Lyngdoh Mawnai 4 snem i iap ngam jyllop namar kam don ka dak mong ha met ne ki dak shah thombor.Haba kren sha ki lad pathai khubor u Bah Vivek Syiem, ula ïathuh naduh ba la Register Case ha Rynjah Police Station, ka kynhun Special Investigation Team (SIT) ka la sdang ka jingtohkit bad ka la ioh ban bishar bniah ïa u khynnah ba dang 13 snem uba sah marjan bad i heprit.U Bah Vivek ula ïathuh hadien ba la bishar bniah ïa u khynnah 13 snem la wanrah hakhmat ka Social Welfare Committee ban pynlong ka jingtohkit.

“Hapdeng ka jingtohkit u khynnah 13 snem ula kubur ha kato ka sngi ula ïalam kai ïa i heprit da kaba phah kiew na kynroh iing ba i sah bad ki la leit sha kato ka iing ba dang shna, hynrei namar ki la ktieh ki la leit sha kato ka jaka ban sait kjat. Ha kato ka sngi ka um ruh ka dap bad u khynnah ula phla ba ula ur bad hapdeng ka jingur ula kum tan lang ïa i heprit ha kaba i heprit ila urlang bad ngam jyllop ha kato ka jaka ba lang um ym duna ia ka 2 phut” la ong u Bah Vivek.

Ula ïathuh u khynnah ula kubur namar ka jingtieng ula da u maw halor met i heprit. “Hapdeng ka jingtohkit la ïohi ba une u khynnah u don ruh ka dien mong na kjat ban pynshisha ba u ur” ula ong.U SP ula ong haduh mynta ka jingtohkit ka dang iai ban pynthikna la ka jingiap i heprit ka dei ka jingbakla ne kaba thmu lypa ban shim ia ka jingim i heprit, hynrei ka kaiphod Post Mortem ka pynpaw ka iap ngam jyllop bad ka kam don kano kano ka dak mong ha met i heprit.Haba kylli u SP ula ïathuh ba ka jingjia bad ka jingiap i heprit ka dei ha kajuh ka jaka ba lap ia ka metiap i heprit.“Haduh mynta ngi pynshisha u khynnah 13 snem u donlang bad i heprit, hynrei ngi donkam ban tohkit bniah, la ka dei ba bakla ne ba la thmu lypa ban shim ia ka jingim i heprit, namar kata ngi la rah ïa u khynnah hakhmat Juvenile Justice Board” la ong u SP.