Shah klun ki jaka riewlum, dawa ka VPP ban sorjamin ki jaka Raid, Hima, Elaka bad Nokma

Ka Voice of the People’s Party (VPP) ka la dawa ba dei ban leh Audit ia ki jaka Raid, Hima, Elaka bad Nokma da kaba kdew ia ka jingsngewkhia kaba jur ia ka jingshah klun ki jaka jong ki riewlum ha Meghalaya. Ia kane ka VPP ka la dawa lyngba u MLA ka Nongkrem constituency u Bah Ardent Miller Basaiawmoit haba wanrah ia ka Special Motion ban ïatai halor ka jingjur ka jingshah klun ki jaka jong ka Raid, Hima, Elaka bad Nokma hapoh ka Jylla. Haba kren hapoh Iingdorbar thawain u Bah Ardent u la kyntu ia ka Sorkar ba ka dei ban lum ka thup jingtip daki kor Computer (Digitalize) bad ban shna map iaki jaka jong ki Raid, ki Hima, ki Elaka, Nokma bad kiwei kiwei ki jaka jong ki paidbah trai ri trai muluk.

U Bah Ardent u la dawa ruh naka Sorkar ba kadei ban thaw ki rukom pynrung kyrteng iaki jaka puta kaba khuid ba suba ha ryngkat ka jingiatreilang bad ki Autonomous District Council (ADC) jong ka Jylla.U la kyntu ruh iaka Sorkar ba kadei ban pyntip lypa iaki paidbah lane ki trai jaka ki ban shah ktah lada donkam ban shim jaka naka bynta ban tei iaki project ne ki skhim bapher bapher bapher. Haba pynpaw ka jingsngewdiaw halor ka jingiai bteng ka jingshah klun jaka jong ki riewlum ka Jylla u Bah Ardent u la ong “Na ka bynta ka jingmyntoi bad ka jingtip jong ka iingdorbar, nga kwah ban pynkynmaw ia kaei ka jingmut jong ka khyndew ia ki trai ri trai muluk. Na ka bynta ki trai ri trai muluk, ka khyndew ka dei ka jingim, bad lada phi shim noh ia ka khyndew ka shyiap jong ngi, phi pyndam noh ia ka histori, ka kolshor bad ka lawei jong ngi, ka khyndew sha ki trai ri trai muluk kam dei ka mar ban die hynrei ka long ka pateng bad ka long ka jinglong, ka burom bad ka jingdon jingem”.

U Bah Ardent u la pyntip hapoh ka iingdorbar thawain ba ki don kumba 24% ki longïing hapoh Meghalaya, ki bym don iala ka jong ka jaka bad ka jingiai shah klun ki jaka jong ki Raid, Hima, Elaka bad Nokma naka bynta ki project bapher bapher ne haki riew shim kabu ka ap jingma iaka lawei jong ki trai ri trai mukul. “Namar kata nga sngewdei ban dawa baka Sorkar kadei ban pynkhlain ia ka jingiada daka ain pyrshah ia ka jingpyndonkam bakla ia ki bor synshar riti dustur na ka bynta ka jingpynriewspah shimet. Ngi donkam ruh ban buh ia ka kaiphod man la u snem ha khmat ka iing dorbar halor ka Jylla halor ka jinglong jong ka jingiada ia ka khyndew ka shyiap jong ki riewlum” u la ong.