Shah thang 3 ki kali ha Pynursla, hadien ba ïashoh bad u nongñiah

Mynta ka sngi u Blei ka la mih ka jingshah thang haduh lai tylli ki kali ha dong Umkor, Pynursla. Kine ki kali ba shah thang kynthup ka kali Swift kaba don ia u Nombar ML05 AE 2904, katba ar tylli ki kali kiba ieng ha syndah jong ka kali Swift ki la iingkhong lang kynthup ka kali Scorpio bad kawei ka kali Redigo. Katkum ka khubor ba la ioh la iathuh ba ka jingshah thang kitei ki kali ka dei ba la don shwa ka jingiakynad bad jingiashoh hapdeng uba niah ia ka kali Swift bad ar ngut ki briew. La iathuh ba ha katei ka jingiashoh, ki ar ngut ba la kynnoh ba kila buaid bha ki la shoh ia u nongniah jong ka Swift, bad utei u nongniah ia ka Swift u la iakhun pyrshah bad dait ia uwei na kti

haduh ban da phlei snam bad bit ruh ha ka kali. La iathuh ruh ba ki ar ngut ki la phet noh na katei ka jaka shipor bad wan phai da ka kynhun kaba kham bun ngut bad kthong ban shoh ia u nongniah jong ka kali Swift, kaba la pynlong ia u nongniah jong ka kali Swift ban ieh ia ka kali bad phet krad sha khlaw ha ka thain Urksew Wahpathaw. La suba jur ba ka jingshah thang katei ka kali ka dei kaba la leh da kitei ki briew hadien ba ki khlem ioh shuh ia u nongniah ka Swift, bad na ka jingkem ding ka Swift la pur ruh sha ka kali Scorpio bad Redigo kiba ieng marjan.

La ioh jingtip ba ha ka por mynstep u trai ka kali Swift ryngkat ki bahaiing ki la leit ujor da ka ejahar ha Pynursla Police Station ban kem ia kiba donkti, kiba la ithuh khmat ruh ia katto katne ngut. La ioh jingtip ba ki trai jong ki ar tylli ki kali ruh ki la leit ujor ejahar ha Pynursla Police Station pyrshah ia kiba donkti ha katei ka kam, bad la kynnoh ha kitei kiba la leh iia katei ka kam ki dei kiba leit fete ba la pynlong ha katei ka dong Umkor.  Halor kane ka jingjia ki pulit ki la pynlong ia ka jingtohkit bad ka jingthwet ia ki briew ba donkti ka la iaid.