Shem jingeh ki nongseng kam lajong bad ki nongthain jain ban iakhun pyrshah ia ki tiar shna thok

Ka Department of Basic Sciences and Social Sciences, NEHU ryngkat ka IIT Guwahati bad IIT Bhilai lyngba jongka projek ba la bei da ka IBITF ka la pynlong ia ka jingai jinghikai “Artisans and Entrepreneurs”, ha kaba la ai jinghikai ia ki nongthain jingthain bad ki nongseng kam lajong ha ka jylla Meghalaya. Kane ka jingai jinghikai kaba la pynlong ha ka 28 tarik u Rymphang ha skulbah NEHU, ka long kum shibynta jong ka project “Empowering Artisans and Farmers of Meghalaya through Blockchain Fintech Solutions” ha kaba ki nongthain jingthain bad ki nongseng kam lajong, kila ioh ia ka jinghikai ban pyndonkam ia ka mobile application kaba la tip kum ka ‘Tracestore’ kaba la pynwandur ban pyniasoh ia ki bad ia ki iew ki hat ha ryngkat bad ban pyninam ia ki mar kiba kila pynmih.

Ki la don 40 ngut ki nongthain jingthain bad ki nongseng kam lajong kiba la wan iashim bynta ha ryngkat bad ki nongtrei, ki nongpyniaid ia ki projek bad kiwei kiwei kiba don bynta lang ha ka kam.Lyngba ka Tracestore app la khmih lynti ba kan lah ban wanrah ia ka jingkylla bad ban kyntiew ia ki tiar ki tar kiba la thain hi bad ban die ha ka dor kaba biang. U Director ka Employment and Craftsmen Training Bah J.P. Lakiang kum u kongsan, ula iaroh ia ka kynhun kaba la leh ia ka kam wad bniah na ka bynta ka jingmyntoi jongka imlang sahlang bad ula iaroh ruh ia ka jingtrei shitom jong ki nonghikai, ki nongwad bniah bad ki nongthaw kiba la noh synniang shi katdei ia katei ka projek.

U Bah Lakiang, ula batai ruh ia ki skhim sorkar kaba ki nongthain jingthain ki lah ban ioh na ka tnad kaba u khmih. Katba u Dr. Sainkupar Mn Mawiong, Principal Investigator jong ka Project, ula pynpaw ki nongthain jingthain bad ki nongseng kam lajong ki shem jingeh khamtam ban iakhun pyrshah ia ki mar ba la shu shna thok bad ula ban jur ba ka ‘Tracestore’ ka plie ia ka lad ba shngain bad ka dei ka e-platform ban shim khia ia ki mat bad pynkup bor ia ki nongthain jain ka jylla.