Shen yn sa pynbna ia ka Resol kam Pulit

U Symbud Myntri ka Jylla uba khmih iaka tnat kampohiing (Police) u Bah Prestone Tynsong u la pyntip ba ka jingthep kam Pulit hapoh ka Jylla kala jan poi artad shaka ba kut. Haba kren shaki lad pathai khubor u Bah Prestone u la ong ba ka jingpynrung kam ia ki Post bapher bapher haka tnat Pulit kala kut bad mynta ka tnat ka dang pynkhreh ban lum iaka Resol hashuwa ban pynbna paidbah.U Bah Prestone ula ong ba ha kane ka kynti, yn thepkam kumba 36 haduh 37 ngut ki samla hapoh ka tnat Pulit.

“Ki jingdonkam baroh la pyndep bad mynta ka tnat ka dang lum iaka Resol hashuwa ban pynbna paidbah iaka Resol jong baroh kiba thepkam Pulit” la ong u Bah Prestone.Haba iadei bad ka jingkynnoh don ka jinglehtuh haka por thoh eksamin, u Symbud Myntri Rangbah u Bah Prestone Tynsong u la ong “Ka Sorkar kala bthah ia Director General of Police (DGP) ban tohkit bniah ia kane ka kam. Hynrei hadien ba la bishar bniah ïa ki kaiphod na baroh ki jaka leh eksamin ha kylleng ka Jylla, ka tnat kam shym la lap satia ïa kino kino ki kam bym hok”.

Lah ban kdew ba naka liang u Nongialam ka Liangpyrshah u Dr Mukul Sangma haki bnai bala dep u la dawa naka Sorkar ban pynlong biang iaka eksamin thungkam Pulit daka ba kynnoh ba ka don ka jingleh bym hok. Haba iadei bad kane u Symbud Myntri ka Jylla uba khmih iaka tnat kampohiing (Police) u Bah Prestone Tynsong u la kyntait war daka ba ong “Kam mih ka jingkylli ban pynlong biang iaka eksamin thungkam Pulit”.