Shilak ki briew ki im jakpoh na Iewduh Kular u Myntri Rangbah T.15 klur ban pynbha ia ka Iewduh

U Myntri Rangbah ka Jylla Conrad K Sangma hynne ka sngi u la pynbna T.15 klur na ka bynta ban pynkhreh ia ka Master Plan ban pynitynnad shuh shuh ia ka Iew kaba la rim tam hapoh ka Jylla kata ka Iewduh. Ïa kane u Conrad u la pynbna ha ka jingleit jurip ia ka Iewduh wat hapdeng ka jingther u lapbah. Ha kane ka sngi la don lang Symbud Myntri Rangbah u Bah Prestone Tynsong, u Myntri ka tnat Tourism u Bah Paul Lyngdoh, ki Ophisar na ki Tnad bapher bapher bad ki Nongmihkhmat jong ka Hima Mylliem. Ha ka jingleit jurip, u Conrad bad u Bah Prestone ki la ïakren markhmat bad ki paidbah, ki nongdie jingdie ha kaba ki la pynsngew ia ka jingeh bad na ka liang u Conrad ula kular ruh ban leh noh mardor ban pynbha bad pynitynnad iaka Iewduh. Haba kren sha ki lad pathai khubor u Conrad u la pyntip ruh ba ka Sorkar Jylla ka la dep mang ia ka pisa ba kot T.6 klur ban shna pynbha ia baroh ki lynti iaid kjat (Footpath) kiba don hapoh kane ka Iewduh.

“Ngi iohi ba ki dang don shibun ki kam kiba hap ban leh bad kumta, mynta ngin sa pynkhreh ia ka Master Plan ban peit kumno ba ngin lah ban pynbha bad pynitynnad ia ka Iewduh ha ka jinglut kaba ym duna T.15 klur” la ong u Conrad haba iakren bad ki nongthoh khubor hadien ka jingjurip. U Conrad ula ong ba ka mang tyngka kaba T.15 klur yn shna shuh shuh ki lynti iaid kjat, ki nala, ka jingtep ia ki pipe um, ban pynbiang bording, umbam um dih bad kiwei kiwei. “Ngi don ka jingsngewkhia namar jan kot shilak ngut ki briew ki im jakpoh bad shaniah ha ka Iewduh. Kumta, ka long kaba kongsan ia ngi ban pynthikna ba ngin kyntiew ia kane ka Iew” ula ong. U bynrap “Ha ka wat kaba ar, ngi khmih lynti ba ngin sa lah ban khot tender noh kham kloi bad nga kyrpang ba ha ki khyndiat bnai ban wan, ngi lah ban khmih lynti ia katto katne ki kam ba kin sdang-namar jong u slap bad kiwei kiwei, ngi lah ban nym lah ban pyniaid wut wut ia ki kam hynrei kan ym shimpor slem, kan sa urlong noh shen”.

Haba kylli, u Conrad ula ong “Ngi la buh ia ka project jong ka Iewduh hapoh ka NEC scheme bad katto katne ka pisa kala wan lyngba ka NEC bad katto katne yn sa bei da ka Sorkar Jylla bad lashai lashai lada donkam ia ki jingtei kiba heh, ngin sa nang wad ia ki lad ban ioh ia ka pisa”. U Conrad ula shim ruh ia ka lad ban iakren iakhana bad ki nongshong dukan madan, ki nongrep bad ki nongshongdukan ha Iew haba pynpaw “Ngi la ioh ia ki jingai jingmut kiba sngewtynnad bha bad ngi la buh jingthoh ia ki”.“Ka dei ka jingwan iuhkjat kaba biang bha bad ngi kular ia ki paidbah khamtam ka Hima Mylliem, ki nongshong dukan bad ki khlieh nongsynshar ba ngin iatreilang ryngkat ryngkat bad ki ban pynthikna ba ngin lah ban pynitynnad bad pynbha ia ka iewduh” u la bynrap.