Shim ba ki jingeh kin long ki mawjam ban pynjanai ia ka kam: Dr Ricky AJ Syngkon

U MP na Shillong Parliamentary  u Dr Ricky AJ Syngkon hynne ka sngi u la pyllait paidbah ia ka Alamanak 2026 (Callender) jong ka Joint Entrepreneurs Transforming Society.Ki kynhun kiba don ha ka JET’s ki kynthup ka Jet24/7, ka KDS Print, ka Taste Tribes bad ka M3 Design Creative Hub.  Ia ka Alamanak 2026, la pyllait ha Iingsah jong u MP u Dr Ricky AJ Syngkon ha ka jingdonlang u nongseng ia ka Jets24/7 u Bah Pynskhemlang W Uriah, u trai ka ka KDS print u Bah Balambokstar Dkhar, u trai ka M3 Design Creative Hub u Bah Pynskhembor L Mawnai bad ki nongtrei jong ka Taste Tribes.

Haba kren ha kane ka sngi u Dr Ricky u la ai jingiaroh ia ka jingdon mynsiem jong ki kynhun ba don ha ka JETs da kaba u la kdew ba ka jingiatylli ka long ka bor bad pynpaw  ruh ia ka jingsngew tynnad ba ka kynhun ka don ia ka jingthmu ban iarap kyntiew ia ki jong la jong.U Dr Ricky u la kyntu ban trei hok haba ki shimti ia ki kam bad ban trei shitom da kaba kdew ba ki jingeh ha ka jingiaid lynti ka kam ki don beit.Ula ong ba ka jingshim jingkitkhlieh ban weng ia ki jingeh ba pynwit ha ka kam ba ki don ka dei lypa ka jingjop haba seng ia kano kano ka kam.

“Shim ba ki jingeh kin long ki mawjam ban pynjanai ia ka kam namar ba ha kaba kut u soh jong ka jingtrei shitom, u long uba thiang” la ong u Dr Ricky.Ka Joint Entrepreneurs Transforming Society ka dei ka kynhun jong ki nongseng kam kiba la tbit, kiba trei na ka bynta ban pynwan dur thymmai ia ki rukom treikam bad kaba lah ban kyntiew ia ka ioh ka kot ka imlang ka sahlang lyngba ka jingiatreilang da kaba pyndonkam ruh ia ki kor ki bor ka Teknoloji.