Shim bynta shitrhem ki khynnah ban pynisap ha Lympung Ki Khynnah Seng Khasi Seiñ Raij

Ka Lympung ki Khynnah Seng Khasi Seiñ Raij ba 21 ba la pynlong ha shnong Tuber Shohshrieh, East Jaiñtia Hills District mynta ka sngi ka la long kaba shongkun ban iohi ia ka sap ki khynnah ba la shim bynta naduh ban pyniaid ia ka jingialang ka lympung ban ai ki jingkren, ki jingshad jingrwai, jinglehkai drama bad kiwei.
Ha kane ka Lympung ba kyrpang ki khynnah, la wan sakhi wan ai mynsiem lang ia ki da u myntri sorkar u Wailadmiki Shylla, u Kyrmen Shylla MLA Khliehriat, u Dy CEM ka JHADC u Lasky Rymbai nalor kiwei de , katba ka Delina Khongdup Member National Commission for Women ka la long kum ka kongsan.
U Dolloi ka Elaka Jowai uba dei ruh u President ka lympung ki Khynnah Seng Khasi Seiñ Raij u ong, ka jingsdang ia ka lympung ki khynnah dei halor ka nongrim ban pynsngewbha ban plie lad lynti ba kin ioh lehkmen da kaba pynlong jinglehkmen manla u snem ha u bnai December bad pynkut pat ha kum kane ka lympung.
Bad kane dei ka rynsan ba kongsan ia ki khynnah ba kin ioh ia ki jinghikai ba iar, kumno ban im tip briew tip blei, ban kamai ia ka hok, ban im tipkur tipkha nalor ban ieid bad burom ia kaei ba la ioh.
Ka kongsan Delina Khongdup haba kren ka la iaroh ia ka sap ki khynnah ban pyni ia kane ka lympung, kumjuh ruh ki bynta bapher bapher ba ki leh ha kane ka sngi, da kaba ong ruh ki long kiba donbok ban ioh kum kane ka rynsan.
Ha kane ka sngi ka kyntu ruh ia u Wailadmiki Shylla ba kum u myntri ba peit ia ki samla un pyrshang wad lad ban pynlong ka prokram ba kyrpang ba heh na ka bynta ki samla ba kin ioh pyni ia ki jinglong tynrai naduh ka riam ka jingshad bad kiwei.
Kum ka dkhot jong ka National Commission for Women haba kren ai mynsiem ia ki khynnah ki samla kumno ban im ka jingim ba bha bada poi shaki kyrdan ba hakhlieh, kala iathuh khana iaka jingim jongka ba kumno ka poi haduh kane ka kyrdan, watla ka dei ka briew ba wan naka longing ba duk bad ka shnong nongkyndong.
Ha kane ka sngi nalor ki kyntien sneng kyntu ki jingrwai jingshad, jinglehkai drama ba la shim bynta tang daki khynnah, la don ruh ka jingsam khusnam sha kiba jop haki jingiakop bapher bapher bala pynlong naduh u bnai bala dep.