Shongkun ka 51 Annual Conference ba arsngi jong ka AMKA

Kumba ju long man la u snem, ban tehsong ia ka jingiaieid, iajan bad jingiatylli hapdeng ki para jaidbynriew Karbi, mynta ka sngi ka kynhun jong ka All Meghalaya Karbi Association (AMKA) ka la pynhap pyrda noh ia ka jingrakhe ia ka 51 Annual Conference kaba la sdang naduh ka 28 bad 29 tarik Kyllalyngkot 2026 ba la pynlong da ka Tamul Kuchi, Byrnihat Unit.
La wan ban shimbynta ha kane ka jingpynhap pyrda ia ka lympung iakynduh lang ki paidbah Karbi, da u Bah Sosthenes Sohtun, Myntri Sorkar Jylla bad u MLA ka Jirang Constituency kum u kongsan ha ka jingiadonlang ruh u MLA ka Nongpoh Bah Mayral Born Syiem, MLA ka Umsning Dr. Celestine Lyngdoh, ka MDC na Nongpoh ka Kong Rona Khymdeit, u Paiem ka Raid Marwet Ken Syiem nalor kiwei kiwei ki riew pawkhmat ka them Ri Bhoi District.
Lah ban kdew, ba kum ka kynhun jong ka AMKA ba lamkhmat mynta da u Bah R.R Ronghang kum u President bad u Bah B.S Timung kum u Secretary, ki ju lum ju lang ia ki paidbah na ka jaidbynriew Karbi kiba sah ha Meghalaya shisien shisnem, ban ia kynduhlang na kawei ka jaka sha kawei pat man la u snem, shibynta ban wanrah ia ka jingia ithuh ithaw, ka jingiaieid iatylli bad ban tip ruh ia ki jingeh ba ki mad bad khamtam ban pynneh pynsah ruh ia ka ka riti dustur bad ki jinglong tynrai.
Haba kren ha kane ka programme, ki nongkren kynthup naduh u Kongsan, ki la ai ka jingiaroh bad ai mynsiem shikatdei ia ki paidbah Karbi, kiba sah ha kane ka jylla Meghalaya namar ka jinglong iatylli bad ia jan ka jong ki, khamtam ruh ba ki long ki jaidbynriew kiba kiar na kino kino ki jingsngew iapher jaidbynriew, hynrei ki iaineh ha ka jinglong kaba khuid bad ban ia tynrong lem iwei ia iwei ha kino kino ki khep.
Ki nongkren ki la ai jingiaroh ruh, ia ki nongialam ka AMKA, kiba na kawei ka snem sha kawei pat, ki ju rung sha ki Shnong ki thaw ha ka jylla Meghalaya ba shong basah ki Karbi, ban iakynduh ia ki, ban lehkmen bad ki khamtam ban tip ruh ia ki jingeh jong ki, kaba kham sngewtynnad ka long ruh, ba ka kynhun AMKA ka phaikhmat ymtang ia ki jingeh, hynrei ban pyniajan para jaidbynriew, ban pynneh pynsah ia la ka riti dustur, ka lehniam bad jinglong tynrai, ban kyntiew ia ka sap ka phong ki samla, ban ai jinghikai ruh ia ki para jaidbynriew ban kiar naki ki jingsniew bad ruh ban kyntiew ia ka pule ka dangle para ma ki.
Na ka liang ki nongialam ka AMKA, haba pynsngew nalor ka jingthmu jong kane ka jingiakynduh lang kaba shisien shisnem bad kum ka jaidbynriew Karbi kiba imsuk imsaiñ hapoh ka jylla Meghalaya, ki la kyntu ruh ia ki bor ba dei peit jong ka jylla Meghalaya bad Assam ban pynbeit noh mardor ia ki jingiakynad kiba mih na ka por sha ka por ha ki thaiñ Block II ha Ri Bhoi District bad ha Block I ha Jaintia Hills District khnang ba kan don ka jingshongsuk shongshngaiñ hapdeng ki khasi-jaintia kiba shong sah ha ki shnong Karbi bad ki Karbi kiba shong basah ha Meghalaya bad kiwei kiwei ki jylla.
Ha kane ka jingrakhe, kaba jingiakynduh lang kaba arsngi, jong ki jaidbynriew Karbi, la pynsngewtynnad ruh da ki jingshad bad jingrwai tynrai jong ka jaidbynriew nalor ki jingshet jingbam tynrai bapher bapher bad ki jingpyninam ruh ia ki tiar thaiñ bad jaiñ thaiñ tynrai jong ki Karbi.