Shu peit u Evanshan ïa ka CM Impact Guide Book, hynrei shaniah pat ha U Blei

Ka Meghalaya Board of School Education (MBOSE) hynne ka sngi Saitjain ka la pynbna ia ka resol jong ki khynnah kiba iakhun ia ka eksam matrik ne ka Secondary School Leaving Certificate (SSLC), mynta u snem. Ka Leisha Agarwal na ka skul St. Margret’s HSS,Shillong bad ka Avilia Kathrene P Lyngdoh na ka North Liberty HSS, Jowai ki la ioh 582 mark bad ki ioh bat ia ka kyrdan ba nynkong jong ka First Twenty. Katba u samla Evanshan Nongrum na ka skul Sacred Heart Boys’ HSS, Shillong bad ka Poori Panday na ka skul Jawaharlal Nehru HSS, Phulbari ki ioh 578 mark ki iohbat ia ka kyrdan baar ha ka SSLC.Haba kren sha ki lad pathai khubor, u Samla Evanshan Nongrum na Sacred Heart Boys Higher Secondary School ula pynpaw ia ka jingkmen bad ula ai burom nyngkong eh ia u Blei uba la don ryngkat bad u. Kumjuh ula ai khublei ia  ki kmie ki kpa bad ki nonghikai kiba la ju kyrshan bad ai jingiarap ia u ha ka pule puthi. U samla Evanshan ula iathuh ba um don satia ia ka Mobile Phone bad u ju pyllut kham bun ka por kumba 7 kynta ha ka shi sngi ban pule ia ka kot bad tang kumba katto katne u pyllut por ha ka ban ialehkai phutbol, Basketball ne sngap jingrwai.

“Nga la pynkhreh ialade da kaba pule kot 7 kynta ha ka shi sngi, hynrei ngam ju khreh kot pat man la ka sngi, hynrei haba nga khreh kot pat nga pynthikna ba nga dei ban khreh 7 kynta shi sngi,” ula ong. U samla Evanshan u la ong ba u kwah ban long kum u riewniam (Phadar) ha ka jingim ka jongu bad ia mynta u don ka jingthmu ban leit pule ha ka Science Stream bad un bteng ban pule ha kane kajuh ka skul. “Ngam shym la mutdur ba ngan poi ha kane ka kyrdan hynrei nga shu duwai ia u Blei ba ka resol jong nga kan long kaba bha. Ka jingjop ka jong nga kan leit sha u Blei uba la iada ia nga bad uba la ai ia ka met kaba koi tba khiah ban thoh iaka eksam bad kaei ka jinghikai kaba nga lah ioh na ki nonghikai nga la lah ban thoh ha ka eksam” ula ong. Haba kylli la ka CM Impact Guide Book kala iarap ne ai jingmyntoi ha ka jingpynkhreh ia ka eksamin, une u samla ula ong, “Nga lah shu peit ia ka CM Impact Guide Book hynrei ngam shym la shaniah pat ia ka, katei ka kot ka long tang ban shu iarap bad kam dei pat kaba iarap ban poi sha ka kyrdan kaba shakhmat. Ngi donkam ban shaniah ha ki nonghikai bad ban don ruh ia ka jingskhem jingmut bad ka jingngeit ha u Blei”.

Katba ka samla Leisha Agarwal kaba la wan nyngkong na ka skul St. Margaret’s Higher Secondary School Shillong kala ong ba ka long kaba donkam ban iai neh haka jing minot bad jingtrei shitom, lada don iaka thong.“Nga sngewkmen shibun ba nga la ioh ia ka kyrdan ba nyngkong ha ka MBOSE Merit list 2025. Nga sngew kyndit haba nga peit iala ka jong ka resol namar nga la ioh 97%” la ong ka samla Leisha.Ka samla Leisha kala ong ba naduh baka rung shaka Class X, ku ju mutdur bad phohsniew ba kan kwah shisha ban wan shakhmat eh haka eksamin SSLC. “Mynta ka sngi kata ka jingangnud kala urlong” kala ong. Ka la ai khublei ia baroh ki nonghikai kiba la kyrshan ia ka ban wan shakhmat ha kane ka eksamin.