Siang karpet ka sorkar ia ka surok Kyrdem-Khyndewso:HYC

Ki nongialam ka Hynniewtrep Youth Council (HYC) Raid Thadrang Circle lem bad ka jingiadonlang ruh da ki nongialam ka Ri Bhoi District Unit ki la sei madan ia ka jingtrei torti jong u Contractor ban tei ia u surok ba la mang na ka skhim Pradhan Mantri Gram Sadak Yojana (PMGSY) ba la mang naduh Nongthymmai Kyrdem ban pyniasoh pat sha Khyndewso u ba don kumba 10 kilometre eiei.

Ha ka jingleit jurip jong ka HYC mynta ka sngi, ba la lamkhmat da u Samla Shemphang Masharing, General Secretary ka HYC Ri Bhoi District Unit, u samla Pyndap Masharing na ka Raid Thadrang Circle lem bad ki dkhot ki la leit ban jurip ia ka jingpyntrei ia u tei u surok ban lap ia ka jingshisha.

Haba kren bad ki Nongthoh Khubor, ki nongialam ka HYC ki la pynrem jur ia u contractor u ba la ioh bynta ban tei ia u ne u surok halor ka jingtrei torti bad la shu trei tang dep ia u ne u surok ha kaba la lap ruh ba ka jingsiang rong ka la long tang kum ka jingsiang carpet iing bad ka bym skhem satia nalor ka jinglong khohrum khohram jong u ne u surok.

Ki la pynpaw ruh, ba ka seng kam nym ailad ia kum kine ki rukom trei torti jong ki contractor ia u surok u ba dei u budlum jong ka roi ka par khamtam ban pynsuk ia ka kit ka bah, ha kaba na ka liang ka seng ka la dawa mardor na ka tnad PWD ba kan shim ia ka sienjam ban phah tei thymmai ia u tei u surok katkum ki kyndon tei surok jong ka skhim PMGSY.

Shuh shuh ruh, na ka liang ka HYC ka la byrthen ba lada u contractor u ba pyntrei ia u tei u surok um shimkhia ban maramot katkum ki kyndon katei ka skhim bad ruh lada ka tnad PWD ka sngap mynthi ka seng kam banse ban shim da ki sienjam ba tyngeh.