Sngewkhia ka Myntri ka koit ka khiah ba kynrei u drok ha Jylla

Ka Myntri ka koit ka khiah ka Kong Ampareen Lyngdoh ka la ong, ba ka sorkar shen kan sa pynbna ia ka Centre kaba kyrpang na bynta ban ai jingsumar ia ki briew kiba kwah ban lait na u drok bad kane ka Centre kan don ha ka nongbah Shillong bad Tura.Haba iakren bad ki nongthoh khubor, ka Kong Ampareen Lyngdoh ka la pynpaw ia ka jingsngewkhia halor ka jingkynrei u drok bad ia ki jingeh kiba la mih na une u jingdih uba la ktah ia ka imlang sahlang bad ia ka jylla. Ka Kong Ampareen ka la iathuh, ba ka sorkar shen kan sa pynbna ia ka Centre ba kyrpang na ka bynta ban ai jingsumar ia kiba dih drok khamtam eh ha ka nongbah Shillong bad Tura.

Ka la iathuh ruh ba ka jylla mynta ka la don ruh ia ka Women Rehabilitation Center ne ka jaka ai jingsumar tang ia ki kynthei, kaba long ka sienjam kaba kongsan ban iakhun pyrshah ia ka jingeh ba mih na u drok.Ka Myntri ka la ong, ki jaka ai jingsumar hapoh ka jylla kim pat long kiba biang ne ban don ia ki tiar kiba paka ban sumar ia ki jingpang kaba iadei na ka jingkyrni ha u droks, kumta ka sorkar ka dang trei shitom ban buh ia ka jaka suamr kaba lah ban ai ia ka jingshakri kaba thikna ia ki riewshimet kiba iakhun ban lait na ka jingkyrni droks.“Ngi dang leh katba lah ban pynthikna ba ha ka por kaba khyndiat, ngin don ia ki kor ki bor kiba lah ban shimkhia ia kane ka jingeh” ong ka Kong Ampareen bad ka iathuh ba la thung ia ka committee kaban kynthup ia ki nongmihkhmat na ka tnad ka koit ka khiah, Social Welfare bad ka pule puthi ban pynwandur ia ka buit treikam ‘Plan’ ban iakhun ia ka jingeh kaba mih da u droks, ha kaba kin iashong pyrkhat bad ban thoh ia ki sienjam kiba donkam ban shim noh mardor.

Ka la ong ba ki don ki jaka ai jingsumar nuksa kum ki CHC kiba don hajan ka nongbah Shillong kaba ki briew kim leit shuh ban phah sumar, kumta dei ban ithuh ia kum kitei ki jaka ai jingsumar bad ban peit la ki long kiba biang ban pynkylla bad ban pyndonkam noh ia ki katkum ka jingdawa kane ka por khnang ba kin ym long kiba sepei.Ka Kong Ampareen ka la pynapw ruh ia ka jingkongsan ban pyntreikam ia ka Drug Reduction, Elimination, and Action Mission (DREAM), ia kaba ka ngeit skhem ba kan ai ia ka jingtuklar kaba biang tam, ban shimkhia bad ban shim ia ki lad kiba dei ban iakhun pyrshah ia ka jingeh kaba mih na ka jingkynrei u droks hapoh ka jylla.