Sngewkhia u Conrad ia ka jingjyllei u drok bad ka jingpang HIV ia ki samla

Ka Synod College ka la pynkut noh hynne ka sngi ia ka jingrakhe dap 60 snem ne Diamond Jubilee bad ia ka College Week 2026 ha Madan Student, Jaiaw Shillong.

Ia ka jingrakhe lyngkhuh snem la pynhap pyrda da u Myntri Rangbah ka jylla u Conrad K Sangma bad ula pyllait paidbah ruh ia ka kot sah jingkynmaw ne ‘Souvenir’ ha ka jingdonlang ka Principal ka College ka Dr G Lyngdoh, u Bah E.R. Kharkrang u President jong ka Governing Body ka College, ki nonghikai, ki samla pule bad kiwei kiwei.

La pynphuh pynphieng ia ka prokram da ki jingrwai kwaiar na ki samla pule, ka jingshad tynrai bad la pynbna ruh ia ki nongjop ha ki jingiakob bapher ba la pynlong ha ka College Week.

Haba kren ha ka jingialang u Conrad Sangma ula ong, kumba 60,000 ngut ki samla man u snem ki dei ban rung ha ki kam ban trei ban ktah, hynrei ka don tang 1,000 haduh 2,000 tylli ki kam sorkar ba lait bad ula buh jingkylli yn leh kumno pat ia ki 58000 ngut kiba sah bad ula kyntu ia ki jaka pule ban shimkhia ban kyntiew ia ka sap ka phong da ki buit thymmai ban sengkam lajong.

U la ong, ka pule puthi ka dei ka atiar ba khlain tam ban wanrah ia ka jingkylla, ha kaba ka sorkar ka la pynlut 1200 klur tyngka man u snem ban kyrshan ia palat 4,500 ki jaka pule bad kumba 120 klur yyngka la mang man u snem na bynta ka tulop ki nonghikai hapoh ka Deficit Grant System kynthup lang ia ka Synod College.

U Myntri Rangbah u pynpaw ka jingsngewkhia ia ka jingjyllei kiba pyndonkam drok bad ka jingpang HIV hapdeng ki samla bad ula kyntu ia ki samla bad ki jaka pule bad ia ka imlang sahlang ban iatreilang ban shimkhia ia kane ka jingtynjuh ba khraw khamtam ka jylla ka don jan 50 na ki 100 ki nongshong shnong kiba hapoh 20 snem ka rta.

Ka Principal ka la ong, ba ia ka College la seng ha u snem 1965 tang da 65 ngut ki samla pule ia ka Pre-University ha ka Arts, hynrei ka College ka la nangheh bad ka don palat 3,000 ngut ki samla pule ha ka Higher Secondary, Undergraduate, Postgraduate bad Professional programme bad ka la ioh ia ka jingithuh na ka NAAC bad ioh ia ka A+ grade.

Ka la iathuh ka college ka dang trei shitom ban pyniar ia jaka pule ha Mawpdang, New Shillong Township, da kaba pynleit jingmut ha ki prorkam ai jinghikai pyntbit ban kamai kajih ban ai jingmyntoi ia ki samla na ka thain bad na ki shnong ba marjan.