Sngewkhia u MLA ïa ka jingpynlong Night Club ka Queen Hotel ha Jorabat

U MLA ka Jirang Constituency u Bah Sosthenes Sohtun mynta ka sngi u la pynpaw ia ka jingsngewkhia kaba jur eh halor ka khubor ba la don ka jingkynnoh pynlong Night Club ne ki kam sngewbha da kawei ka Hotel kaba la tip kyrteng kum ka Queen Hotel kaba don Jorabat ha ka liang jong ka jylla Meghalaya. Katkum ka khubor ba la iohlum da u MLA la ong ba ka la don ka jingkynnoh, ba ki bor jong katei ka Queen Hotel, ki ju pynlong ia ki programme leh sngewbha lane Night Club haman ka sngi Thohdieng, Sngi Saitjaiñ bad wat ha ka sngi u Blei khlem da burom shuh ia ka jingsngew jong ki riew paidbah lane ban ioh ia ka jingbit na ki bor ba dei khmieh jong ka Ri Bhoi District.
U Bah Sosthenes Sohtun, haba pynpaw ia ka jingsngewkhia kaba jur ba katei ka hotel ka pyniaid ia kita ki kam leh sngewbha kata hapoh u pud u sam jong ka Constituency jong u, u la pynrem jur ia ki trai jong katei ka hotel kiba pynkhein ia ki kyndon ain ban pynlong Night Club khlem ioh jingbit bad ka bym iahap satia.
“Nga la ioh khubor ba ki don shibun bah ki kali ba remdor kiba ju leit Ha kane ka hotel ha ki sngi kut taiew, bad la don jingkynnoh ba kane ka hotel ka ju pynlong night club ha kine ki sngi”, ong u Bah Sosthenes Sohtun. U la pynpaw ruh, ba na ka liang jong u kum u nongmihkhmat paidbah, un shimkhia ban bthah ia u Deputy Commissioner ka Ri Bhoi District ban pynlong ia ka jingtohkit halor kane ka jingkynnoh pynlong Night Club da ki bor jong ka Queen Hotel bad lada lap shisha kin ngat katkum ki kyndon ain.