T.26 klur ka kuna yn mab ka MeECL, pynjlan haduh 30 Iaiong ia ka skhim OTS

Ka Meghalaya Energy Corporation Limited (MeECL) ka la pynjlan ia ka One Time Settlement (OTS) Scheme 2025 haduh ba kut u bnai Iaiong. Lah ban kdew ba ia ka OTS scheme la pyllait da u Myntri Rangbah ka Jylla u Conrad K Sangma ha ka 4 tarik Lber 2025 bad ka bai bording bala pynsahteng ban siew da ki nongthang bording kala kot ia ka T.119 klur. Kane ka jingpynjlan ka MeECL iaka OTS kadei ban ailad iaki paidbah ban shim kabu ïa kane ka skhim bad kumjuh ruh ban khyllie pat ia ki bai bording bym pat siew da ki nongthang bording.

Ka OTS ka kdew ba tang ki nongthang bording kiba la shah ot bording ki lah ban aplai ia ka OTS scheme 2025 bad ban ioh ia ki jingmyntoi. Haba pyntip ïa kane u Myntri ka tnat Bording u AT Mondal u la ong ba haka jinghisha ka OTS scheme 2025 kan treikam tad haduh ka 31 tarik Lber hynrei haba iohi ia ka jingwan shakhmat ki nongthang bording, ka MeECL kala pynjlan haduh da kut u bnai Iaiong 2025.

“Jan kot haduh 45000 ngut ki nongthang bording kin ioh jingmyntoi bad palat T.26 klur ka kuna yn sa map noh. Ki nong thang bording kin hap ban siew tang ia ka trai ba 40% bad ia ka 60% ba sah kin siew ha ki 5 tylli ki instalment ba mar kat juh khlem ka sut” ong u CM haba pyllait ia ka skhim. Ka OTS scheme 2025 ka treikam tang ia ki “Domestic Low Tension (DLT)” bad “Kutir Jyoti/ BPL” kiba pynbna ia ka jingthang bording ba 5 Kilowatt bad hapoh na ka bynta ki nongthang bording kiba la shah ot bording namar ka jingbym siew bai bording, khnang ban lah ioh noh ia ka bai bording ba dang sah.