Tang hadien 2 bnai mih thliew ka surokbah, 20 sngi ai por ka JSU ban maramot

Ka Jaintia Students’ Union (JSU) hynne ka sngi ka la ai por 30 sngi ia ka National Highway Authority of India (NHAI) bad ia u Kontraktor ba ki dei ban shim jingkitkhlieh ban pyndep maramot ia ka surok na bynta ka jingshngaiñ ka leit ka wan ki paitbah ka ri lum Jaiñtia.

U Borntifulson Rupon, Executive Member jong ka Jaintia Students’ Union (JSU) ula pynpaw ka seng ka ieng skhem ha ka nongrim ban pyrshah ia ka jingma bad ka jingsniew palat pud ka rukom shna ia ka surokbah thymmai.

U la ong, ka surok dang dep tang 2 bnai hadien ba u kontraktor, PBPL ka la aiti ia ka projek hynrei ka la sdang sniew noh. Ki la don ki thliew ba heh bad ka jingorpait ka surok kaba lag ban buh jingma ia ki paidbah nongleit nongwan.

“Ngi lah ai ka jingbthah hapoh 30 sngi ka NHAI bad u kontraktor, ki dei ban shim ia ka jingkitkhlieh ban pynlut pynsep ban maramot mardor ia kane ka surok kaba jot tang ha ki khyndiat bnai. Lada ki leh bym suidniew ia kane ka jingdawa bad lada ym pynbeit ia kane ka jingdkoh hapoh ka 30 sngi, ka JSU kam banse ban pynlong jingiakhih pyrshah ia kane ka kynhun ba pyntrei bad ki bor dei peit” la ong u nongialam ka JSU.

U la iathuh ba hadien jong katei ka jingai por, ki nongialam ka JSU kila iakren lyngba ka phone bad u Project Director ka NHAI bad ula ai ka jingkular ba yn sa leh noh mardor ia ka jingmaramot ia ka bynta jong katei ka surok da kaba buh hakhmat eh.

Ka Seng ka pdiang ia kane ka jingshimkhia ba mardor bad ka khmih lynti ban iohi ia ki kor ki bor ha ki surok namar ym lah ban iapeiñ ia ka jingshngaiñ ki paid Jaintia bad ka seng kan peitngor bad ki bor ba dei peit kin leh ia kaba donkam.