Thaw ka sorkar 30 ki jaka test um, ban ioh umdih ba khuid ki paidbah

U Lat ka Jylla u CH Vijayashankar ula pyntip ka Sorkar Jylla ka la buh 30 tylli ki jaka test ia ka um bam um dih lane ki Laboratories ha kylleng ka Jylla ban pynthikna ba ki paidbah kin ioh ka umdih kaba khuid. Haba jingkren ha ka sngi sdang jong ka Dorbar Mang Tyngka ka Jylla, u Lat CH Vijayashankar ula ïathuh ba ki 30 tylli ki Laboratory ban test ne eksamin ia ka um ki dei ba la ithuh da ka NABL.Ia ki Laboratory la tei man ki district bad sub division ban pynthikna ia ka jingsam umbam umdih kaba khuid sha ki paidbah nongshong shnong.U Lat ka Jylla ula pyntip ruh ba palat 5.2 tylli ki Longiing ha ki shnong Nongkyndong ki la ioh ia ka kor um iing lyngba ka Jal Jeevan Misson (JJM).

“Tang ha kine ki khyndiat snem, ka Meghalaya ka la kiew bha. Na ka 0.72% ka jingpoi kor umiing ha u 2019, ka Sorkar Jylla ka la lah ban pynpoi kor um iing haduh 81% ki longiing tad haduh u Kyllalyngkot 2025, kaba long palat ia ka National average” la ong u Lat.U la pyntip ruh ba haduh 4,024 tylli ki Shnong kila ioh kor um iing ba kot 100% kaba pynlong ia ki kum ki shnong bala tip kum ka “Har Ghar Jal”.Haba iadei ki jaka ba ki tyllong um kila tyrkhong na ka jingkylla ka suinbneng, u Lat u la ïathuh ba ka Sorkar Jylla ka la shim ia ki sienjam ban pynim biang ia kine ki tyllong um bad ban shna ia ki pung pyllang um.

Nalor kata, ka Sorkar Jylla kala pyntrei ruh ia bun tylli ki water supply scheme kiba heh ba kynthup ha Shillong, New Shillong, Williamnagar, Nongstoin, Ampati bad Tura.