Ther ka Congress ia ka BJP, ka thombor ia ki kynthei bad longiing baduk

Ka General Secretary jong ka All India Mahila Congress ka Lhingkim Haokip hynne ka sngi ka la ther ia ka Sorkar Pdeng bad ïa u Myntri Rangbahduh u Modi namar ki Policy pyrshah ia ki kynthei. Ka la kynthoh ka Sorkar Pdeng ba ïalam ka BJP ka Lhingkim ka la ong, katba ka Sorkar Pdeng ka kren ia ka jingpynkup bor ia ki kynthei, ki kam pat ki la nangpyntroin ia ka jingkamai laitluid jong ki kynthei. Haba kren sha ki lad pathai khubor ha Shillong, ka Lhingkim ka la ong “Ka jingpynkup bor kam dei ka slogan kum ka “Beti Bachao’. Ka jingkup bor ka mut roti, rozgar aur suraksha”. Ka Lhingkim ka la ong, ka Congress ka ngeit ka jingpynkup bor ym lah ban pynkut tang ha ka jingkren.Ka la kdew ki kynthei ki dei ba shah ktah jur tam ha ka jingkiew dor ki mar ki mata, ka jingnang duna ki skhim ka bha ka miat, ka jingbym ioh kam bad khate ia ki jingkyrshan ha ka kamai jakpoh.

Ka la iathuh ka Congress kan sa pynlong ia ka jingiakhih kum ki awareness campaign bad iakren ia ki jingeh ki kynthei na ki shnong sha ki surok bad sha ka Iingdorbar Parliament.Haba kren halor ka skhim MGNREGA ka Haokip ka la ong, ka jingpynkylla ka sorkar u Modi ia ka skhim MGNREGA ka dei ka jingthombor ia ki kynthei bad ki nongkyndong ba duk, ka skhim MGNREGA ka dei ka hok ba shong ban ai kam bylla ia kiba duk ba la tip ka skhim bylla 100 sngi. Ka Lhingkim ka la ong ki kynthei ki dei ki nongtrei ba bun ha ka MGNREGA khamtam ki kynthei riewlum bad nongkyndong ban ioh bylla kamai.

Ka Congress ka dawa ban siew bainong ha ka por ba biang bad mang pisa bun bad kumjuh ban pynkhlain ia ka Act.Ka la pyntip ba ka Mahila Congress kan iai bteng ia ka jingialeh ban pyrshah ia ka MGNREGA bad iakhun pyrshah ia ki policy ba buh ha ka jingma ia ki kynthei, ki nongtrei bad ki briew ba duk.