Ther u bah Ardent ia ka sorkar MDA, ka ilekshon MDC ha Jaintia kam long laitluid ia ki nongthep vote

U President ka Voice of the People’s Party (VPP) u Bah Ardent Miller Basaiawmoit hynne ka sngi, ula pynpaw ha ka Iing dorbar ba ka ilekshon MDC ha JHADC kam long kaba laitluid bad ba hok. Haba shim bynta ban iatai ia ka jingkren u Lat ka Jylla ha ka sngi sdang ka Dorbar Mang Tyngka, u Bah Ardent ula kyntait ia ka jingkren u Lat ba ka ileshon MDC ha JHADC ka long kaba iaid beit khlem jingpynthut. “Nga pyrshah jur ia ka jingkren u Lat ba ka ilekshon MDC ba dang shu dep ka long kaba laitluid bad kaba hok bad ka ilekshon ba laitluid ka long tang ha KHADC katba ha KHADC kam long laitluid” la ong u Bah Ardent. U Bah Ardent ula ong, ba lada ka ilekshon hapoh rilum Jaintia ka long kaba laitluid, ka VPP kan ioh ban synshar marwei kumba ka ioh synshar ha KHADC. Ula ong naduh shwa ban long ka ilekshon MDC, ka VPP ka la tip ia ki rukom, ki dustur bad ka kolshor ha Jaintia Hills haba ki leit sha ka ilekshon. “Ha ka ilekshon sha Rilum Jaintia, ki nongialam shnong kin rai iano ban kyrshan bad kine ki nongialam shnong kin pynbor ia ki nongthep vote ha la ki shnong jong ki ba ki dei ban thep Vote tang u kyrtong ba la jied da ki nongialam shnong” u la kynnoh.

U Bah Ardent ula ïathuh ba ka VPP ka la ujor sha ki bor district kynthup sha ki RO halor ka jingshah pynbor ki paidbah ha ki nongialam shnong, hynrei na ka liang ki Bor District ki khlem shim khia ïa kano kano ka sienjam ban pynthikna ba ka ilekshon kan long kaba laitluid.Ula kynnoh ruh uwei na ki polling agent ka VPP na Nartiang constituency ula shah rahbor ha ka sngi thep vote bad uwei pat ula shah rah ha ki nongiakhun pyrshah bad ki la thmu ban bret ia u na ka jingkieng.“Nga don bun ki kopi FIR kiba la ujor sha ka pulit bad nga ong, ia phi ba ka VPP kan ym shong kli kti bad ngin iakhun haduh ba ki paidbah ka Jaintia Hills kin ioh ia ka hok laitluid ban thep vote” u la ong. Ha kajuh ka por, u MLA ka Jowai u Bah Wailadmiki Shylla haba shim bynta ha ka jingiatai hynne sngi ula kynthoh bad pynrem ïa u President ka VPP Bah Ardent Miller Basaiawmoit da kaba ong, “Ha ki constituency ba jop ka VPP, ki paidbah ki ioh thep Vote laitluid katba ha ki constituency ka rem, ki ong ki paidbah kim ioh laitluid ban thep Vote”.  “Kum u nongmihkhmat bad kum u MLA na Jaintia Hills nga sngewsih ban ioh sngew ba ka ilekshon MDC ha Jaintia kam long kaba laitluid. Ka long kaba sngewsih haduh katta ban ioh sngew na u nongialam ba la rangbah ba ula ong, ba ha ka jaka ki la jop, ka long laitluid bad jaka ba rem, kam long kaba laitluid bad ba hok” la ong u Bah Wailad.

U Bah Wailad ula ong, ba ka jingkynnoh u President VPP kam dei ban sngewlyngoh namar ha ki ilekshon, ki Party ba shah rem ki wad daw bad kynnoh pyrshah ia ka Party ba jop.“Kane la ju jia ruh ha ki snem ba la dep bad ha kiwei ki Jylla, ha kaba don ki Party ba rem, ki ai daw ba dei namar ki kor EVM bad kumta ter ter, ka long kaba sngewsih haduh katta katta ban ioh sngew na u nongiakam ba rangbah” u la ong.U Bah Wailad u la ong ba ki paidbah ka Rilum Jaintia ki la leit thep vote da ka mon laitluid bad ki la dep ai ia ka rai jong ki ha ka ilekshon MDC.