Ther u CEM ia u Bah Pala ba kynnoh pynlong ATM ka VPP ia ki khyrdop ka Council

U Chief Executive Member (CEM) ka Khasi Hills Autonomous District Council (KHADC) Bah Winston Tony Lyngdoh hynne ka sngi ula ther tyngeh ïa u President ka Meghalaya Pradesh Congress Committee (MPCC) u Bah Vincent Pala halor ka jingkynnoh ba ka Executive Committee (EC) KHADC hapoh ka jingialam ka Voice of the People Party (VPP) ka la thaw ki khyrdop ban pynlong “ATM” ban ioh lum pisa. Haba kren sha ki lad pathai khubor u Bah Winston ula ong, ka EC ka la lah ban tehlakam ia ka jingmih ki khyrdop ha ki surokbah ban pynduna sha 10-11 tylli na ki 23 tylli ki khyrdop ba don mynshwa shwa ban shimti ka VPP ia ka EC ha KHADC.

“Nga tharai phi donkam ban pan jingpynshai na u Bah Pala. Nga la iohi ia ki jingkren jong u ba u la kynnoh naduh ba ka VPP ka wan ha ka bor ha KHADC, ki khyrdop ki la kylla lum khajana ki long ki ATM ka VPP” la ong u Bah Winston. U CEM ula kyntait ia katei ka jingkynnoh da kaba ong, ha ka por ka Executive Committee (EC) barim ki la don haduh 23-24 tylli ki khyrdop hynrei EC ba mynta ka la pynduna haduh 10-11 tylli.

“Ka Council ka dang pynbeit halor kane ka kam. Hynrei ban kynnoh ka VPP ka pynkylla ia ki khyrdop kum ki ATM ka long kaba ym lah ban pdiang. Ki khyrdop ba donkam kin bteng ban treikam bad ka jingbuh khyrdop ka long katkum ki kyndon ban ym leit ei ka khajana bad kam dei ba council ka shu pynieng kumba la kynnoh” ula bynrap.