Thombor ki nong Bengali Basti ïa u Rangbah shnong Maikhuli

Ka jingjia shah thombor ha ka shnong khappud ha Ri Bhoi District, kata ha Maikhuli ka la jia biang ha kaba ki nongshong shnong ba hap ha Assam ba la tip kum ka Bengali Basti ki la thombor ia u Rangbah Shnong ka Maikhuli bad ia ar ngut ki khun jong u lem bad ki katto katne ki nongkitkam shnong.

Katkum ka jingtip ba la ioh lum la iathuh ha ka janmiet jong ka 29 tarik Lber, u Rangbah Shnong ka Maikhuli u Nicholas Marak lem bad ki khun jong u ba kynthup ia u Sangwat J Sangma bad u Ricky J Sangma bad u wei u nongkitkam shnong ba la tip kyrteng kum u Ajitabh Barman ki la shah thombor bad shah ktah kti ha ki nongshong shnong ka Bengali Basti, Assam.

Halor kane ka jingjia, na ka liang u Nicholas Marak, Rangbah Shnong ka Maikhuli, u la iathuh, ba ki nongshong shnong ka Maikhuli ki dang iai mad ia ki jingeh ha kaba ia dei bad ki jingiakajia pynbeit pud pynbeit sam khamtam ha kaba ia dei bad ka jingshah pynhap ka pung ri dohkha jong ka Maikhuli sha Assam ha kaba ki nongshong shnong ki dang iai dawa ban pynioh biang ia kane ka pung bad na kane ka daw ka la nang mih ki jingjia iakynat na ka por sha ka por.

U la iathuh ruh, ba ha ka jingjia kaba la jia ha ka 29 tarik Lber nohphai sngi, katto katne ngut ki briew na ka shnong Bengali Basti ka shnong markhap hapoh ka Assam ki la thombor nyngkong ia ki arngut ki khun jong u da kaba bom da ki dieng ki siej, la bynrap ruh ba hadien kine kiba thombor ki la phah wan mih ia u Nicholas sha katei ka jaka bad hadien ki la shoh bad bom lang ia u lem bad i u wei u nongkitkam shnong ka Maikhuli.

Halor kane ka jingjia shah thombor ki nongialam Shnong ka Maikhuli, la ujor ejehar ha Basistha Police Station Assam ban pynlong ia ka jingtohkit.

Na ka liang u MLA ka Jirang Constituency u Bah Sosthenes Sohtun, u la shimkhia ruh ban iakren bad u Superintendent of Police ka Ri Bhoi District ban tuklar bad ki bor ka pulit Assam halor kane ka jingjia ban iada na ki jingjia kiba sngewsih bad kiba lah ban ktah ia ka shongsuk shongshngaiñ ha ki shnong khappud.