Thrang u MLA Mawhati ban pynlong ia ka pung Umiam ha Tyrso kum ka Fish Sanctuary

U MLA ka Mawhati Constituency u Bah Charles Marngar, u la pynpaw ia ka jingthrang ban kyntiew ia ki bynta ka Wah Umiam ha ka thaiñ Tyrso, hapoh Mawhati Constituency kum kawei na ki thaiñ kaban paw bha ha ka almanak jong ka tnad Tourism ka jylla Meghalaya. Ia kane u Bah Charles Marngar u la pynpaw hadien ka jingleit jurip jong u ia katei ka wah hadien ka jingpyndep ban plie pyrda ia ka Tamasa Amur Falcon ha Umtngam, ha kaba la synranlang da u MLA ka Umsning Constituency u Dr. Celestine Lyngdoh bad u Deputy Commisioner ka Ri Bhoi District u Abhilash Baranwal.

Haba kren sha ki Nongthoh Khubor, u Bah Marngar kum u nongmihkhmat paidbah ka Mawhati Constituency, u la pynpaw ba kane ka thaiñ ka don shisha ia ka jingkyrmen ban kyntiew ia ka kam jngohkai pyrthei bad ban rung hapoh ka almanak jong ka tnad Tourism ka jylla Meghalaya, namar ka jingdon ia ki jaka kiba itynnad bad kiba khring bha ia ki nongjngohkai pyrthei. “Kum ha ka shnong Mawrathud kawei na ki Shnong ha kane ka Constituency kaba don shibun ki jingitynnad kum ki krem, ki mawksing, ki kshaid bad kiwei kiwei bad ka jinglong ka mei mariang ka don jingkyrmen bha ban kyntiew ia ka kam jngohkai pyrthei” ong u Bah Charles Marngar da kaba ong ruh, ba un shimkhia ba kane ka jingangnud jong u kan urlong shen.

Nalor kiwei kiwei ki kam jngohkai pyrthei, ka pung Umiam hapoh ka thaiñ Tyrso ka don ia ka lad ban pynlong ruh ia ka kum kata ka fish sanctuary namar ka jingdon shibun ki dohum bad ruh kum kata ka jaka kienglieng kaba itynnad, kumta shen un sa shimkhia ban phaikhmat sha kine ki bynta ban urlong noh shen.