Thud ka leit ka wan ba khie jumai ha Shillong

Ka tnad Revenue and Disaster Management ka jylla bad ka Meghalaya State Disaster Management Authority ha ryngkat ka jingiatreilang bad ka National Disaster Management Authority ka sorkar India, ki la pyllong ia ka State Level Mock Exercise ban ai jinghikai halor kumno ban iada bad pyllait im ia ki briew lada khie u jumai ha kane ka jylla.

Ka jingpyllong ia kane ka Mock Drill ka long na bynta ban hikai bad pynsngewthuh ia ki paidbah ba kin tip ban pynkhreh kumno ban leh haba wan u jumai bad kumno ban iada, ban pyllait im ia ki briew haba shah lyngshop ha kino kino ki bor ka mariang.

Ia kane ka mock drill la pyllong hynne ka sngi ha kylleng ki jaka ha nongbah Shillong kynthup ha Iew Polo, Buddha Vidya Ninetan Secondary School, ophis ka Soil & Water Conservation, Police Reserve, Wahingdoh bad ha Lawmali.

Haba kren sha ki lad pathai khubor ka Deputy Commissioner ka East Khasi Hilla ka kong Rosette Mary Kurbah ka la ong ba hashwa ban pyllong ia kane ka Mock Drill, ki ladep pyllong haduh san tylli ki jingialang na bynta ban pynkhreh ia kane.

Ka Deputy Commissioner ka la ong ba ia kane ka Mock Drill ki la pyllong da kaba shim ba ka jingwan u jumai uba khlain bor haduh 8.3 Richter scale.

“Kane ka mock drill kam dei kaba shu lehkai ne kam dei ka kamkai hynrei ka dei ka jinghikai bad ban peit haduh katno la pynkhreh lada wan u jumai namar ba kane ka thain ka dei ka Zone 5 kaba ju iaid bha u jumai uba khlain bor,” ong ka kong Kurbah.

Ka Deputy Commissioner ka la ong ba kane ka long ban hikai ia ki briew haba ki don ha iing ne ha madan na hangno hangno ban iada ban lait na ka jingma.