Trei torti ka MP Agarwal ïa u surok PMGSY na Byrnihat ba pyniasoh bad ka Umden

Ki nongialam ka Synjuk ki Rangbah Shnong Rud Wah Umpli ha ryngkat u Majistor ba la mihkhmat na ka ophis Deputy Commisioner ka Ri Bhoi District mynta ka sngi ki la pynlong ia ka jingjurip ia u surok PMGSY ba pyniasoh ia ka Umden ha Nongpoh Constituency sha Lumnongrim Byrnihat kaba hap hapoh ka Jirang Constituency.

Ka jingleit ban jurip ia u tei u surok PMGSY ba 38.7 kilometres ka la long hadien ba ka la don ka jingujor na ki Rangbah Shnong jong katei ka thaiñ kaba don kumba 23 tylli ki shnong halor ka jingtrei torti jong ka kompani MP Agrawal Pvt Ltd. ban shna ia u ne u surok.

Ia ka jingjurip ia u tei u surok Umden, Jowe sha Lumnongrim, la ialam da u Bah Henry Nongrum kum u Chairman, u Coming Ingti, Organizing Secretary ka Synjuk ki Rangbah Shnong Rud Wah Umpli, katba na ka liang ki bor district la mihkhmat da u Akash Marak, Assistant Commissioner kumjuh ki ophisar na ka Tnad PWD.

U Bah Henry Nongrum u la iathuh, ba ha kane ka jingleit jurip ia u tei u surok, la lap shisha ia ki bynta ba la trei torti da ka MP Agarwal Pvt. Ltd la shu trei tang ban dep namar ka jingsiang rong ka long kaba stang shaba palat ha kaba lah wat ban khat ruh da ki shympriah kti.

“Katno ngi dap da ka jingkmen ban ioh jingpynmang pisa na ka skhim PMGSY ban ioh surok ba paka ba la mang da ka sorkar, hynrei ka jingtreikam torti jong ka kompani ka pynduh mynsiem shikatdei eh, namar ki paidbah ki thrang ban ioh da u surok u ban neh da ki phew snem ym ban duh noh tang katto katne por”, ong u Bah Nongrum da kaba bynrap ba halor kane ka jingjurip la dawa na ki bor pyniaid district ban shimkhia bad ban bthah ia kane ka kompani ban siang rong bad tei kumba la mang.

Ki la iathuh ruh, ba ki don ruh ki jingtei hume pipe ia kiba la khmieh lynti ba kane ka kompani kan trei bha bad ruh ban tei ia ki cut wall ha ki bynta u surok kiba don ki iing ki sem najrong u surok khnang ban pynneh ia u ne u surok bad kum ka Synjuk ka kyrmen skhem ba ia kane ka jingtei ia u surok dei ban pyndep noh ha ka por kaba biang hashwa ka aiom slap.