Tuid ki riewngeit da ki lak ha ka Jingiaseng Synod Sepngi

Da ki lak ngut ki paid riewngeit jong ka Balang Presbyterian mynta ka sngi ki la tuid sha ka Jingiaseng Synod kaba ar phewlai jong ka Khasi-Jaintia Presbyterian Synod ha ka Balang Presbyterian Sakwang, South West Khasi Hills District. Nalor ki jingrwai paitbah, ka jingpule na ka Ktien Bakhuid U Blei bad ki jingrwai Choir, la ioh ruh ia ka jingkren na u Rev. RR Rapsang ha ka Jingiaseng Paitbah ba nyngong bad na u Rev. CL Laloo ha ka Jingiaseng Paitbah ka ba-ar.Haba ai jingkren ha ka Jingiaseng Paitbah ka ba-ar, u Rev. Laloo ula khot ia ki riewngeit jong U Trai ba kin pynieng ia ka lama ha U Khrist. U la ong ba ka lama ba nyngkong ba kum ki Khristan ki dei ban pynieng, ka dei ka lama jong ka jingjop ha ka jingialeh, kaba la wan ban sieh ia ka da u Rev. Thomas Jones ha ka 22 u Jylliew jong ka snem 1841 ha Nongsawlia, Sohra. U la pynkynmaw ba ka diengphna banyngkong eh ba la pynieng ha Rilum Khasi-Jaintia ka dei ka diengphna jong ka kurim u Rev. Thomas Jones, ka Ann Jones kaba la khlad noh ha ka 22 tarik u Nailar jong ka snem 1845 ha kaba la tep ia ka ha u lum jingtep ka Balang Presbyterian ha Nongsawlia, bad la pynieng ia ka diengphna ba nyngkong eh ha ka Rilum Khasi-Jaintia.  U Rev. Laloo u la pynkynmaw ruh ia ka jingialeh jong u Syiem Bakhraw tam ki Israel, u Syiem Dabid uba la kren shaphang ka thma ba ha ki Psalm 20:7 da kaba ong, “Don kiba shaniah ha ki kali, kiwei pat ruh ha ki kulai: hynrei, ngi ngin iathuh ia ka kyrteng U Trai U Blei jong ngi”. U la pynkynmaw ba kumno une u shakri jong U Blei u la jop bun ki thma, namar ba u leit ban ialeh ha ka kyrteng jong U Blei baim.

U la pynkynmaw ruh ba kumno u Syiem jong ka Hima Judah, u Jehoshaphat u la sheptieng haba u la iohi ia ki paid iapom babun jong ki Moap bad Amon, bad u la phai sha U Blei da kaba khot ia baroh ki paitbah ba kin duwai bad shah jynit ban ioh ia ka jingisnei U Blei, bad U Blei u la kren ha u ba um dei ban khuslai namar ba “ka thma kadei ka jong U Trai”. Kumta une u Syiem u la jo pia ka thma.  U Rev. Laloo u la kyntu ia ki paid riewngeit ba ha ka jingim Khristan, kin hap ban mad ia shibun ki jingeh bad jingialeh ba manla ka sngi, hynrei kidei ban shaniah ha U Blei ban ioh ia ka jingjop. U Rev. Laloo u la ong ba kawei pat ka lama kaba ki Khristan kidei ban pynieng kadei ka lama jong ka jingpynithuh ialade ba ngi long kijong U Khrist ha ka pyrthei ne ka Christian Identity. U la ong ruh ba ka jingiaieit bad ka jinglong khuid kidei ki dak ba shabar ba ngin pyni sha ka pyrthei ba ngi long ki Khristan ne ki jong U Khrist. U la pynkynmaw ruh ia ka jingkut jingmut jong u Daniel haba u don ha ka ri nongwei ha kaba u la rai kut ban ‘ym pyntngit’ ialade lyngba ki jingbam jingdih, bad ban pyni ialade sha ka pyrthei ba udei u shakri bakhuid jong U Blei. U la ong ba kawei pat ka lama ba ki Khristan kidei ban pynieng kadei ka lama jong ka jingsngewrit. U la pynkynmaw lyngba ka Proverb 16:18 ka ong, kaba ong, “Ka jingsarong ka iaid ha shuwa jingjot bad ka mynsiem ba sngewmeng ha shuwa ka jingkyllon”. U la kyntu ia ki riewngeit ban long kiba sngewrit bad ban long ka mluh ba don jingmad ha ka pyrthei.

U Rev. Laloo u la ong ruh ba kawei pat ka lama ba ki Khristan kidei ban ieng ka long ka lama jong ka jinglaitluid. U la ong ba baroh u briew u la long u mraw jong ka pop, hynrei lyngba ka snam jong U Khun Langbrot la pyllaitluid ia ngi. U la pynkynmaw na ka Gospel u Ioannis 8:34 kaba U Jisu u ong, “u briew baroh uba iai-leh ia ka pop u long u mraw jong ka pop”. Hynrei, kum ki Khristan ngi sngewkmen ba U Jisu u la pyllaitluid ia ngi, la ong u Rev. Laloo uba la kdew ruh na ka Shithi U Apostol Paul sha ki Galatia 5:1 kaba ong, “Ia ka jinglaitluid U Khrist u la pyllait ia ngi: namar kata, to ieng skhem, bad wat ai ba yn riam ia phi pat ha ka lyngkor ka jinglongmraw”. Kane ka Jingiaseng Synod ka la long kaba iaid beit iaid ryntih ha kaba ka jingdheng kali ruh ka long kaba duna haduh katta katta lyngba ka jingpynbiang jong ka Sorkar Jylla ia ki lynti bad ki surok ha manla ki lad bad ki jaka.