Pynkup burom ka MSCW ia 12 ngut ki longkmie kiba la noh synniang ha ka imlang sahlang

Ka Meghalaya State Commission for Women (MSCW) hynne ka sngi ka la rakhe ia ka International Women’s Day ne ka sngi kyrpang ha ka jingialang ha Additional Secretariat, Shillong bad ha kane ka jingialang la pynkup burom ia 12 ngut ki longkmie kiba la trei shitom ban noh synniang ia ka imlang sahlang. Ki 12 ngut ki longkmie kiba la shah pynkup burom  ki kynthup ia ka Kong Chiefstylemen K Lyngser na Jaiaw Laitdom, Kong Marjop Dohtdong na Mawiong rim, Kong Nebi Lyngwa na Pohkseh , Kong Nabon Kharkongor na Madanryting, Kong Naomie Roy Lyngdoh na Umpling, Kong Mary Klinsibin Badwar na Malki , Kong Prithina Dohling na Lawsohtun, Kong Jelin Rose Shadap na Mawlai Kynton Massar, Kong Finelist Thangkhiew na Nongskeh, Kong Aplinda Nongrum na Nongmynsong, Kong Noreen Mary Benedeth Khonglam na Laban bad ka Kong Rita Mukhim na Laitkor.

Ka Chairperson jong ka MSCW ka Kong Iamon Syiem kala ong ba ki longkmie ki la iaid lynti kaba la jrong ban ioh iala ka jong ka hok, hynrei dang bun pat kiei kiei kiba dang donkam ban leh ban pynbha shuh shuh. Katba ka Prof Badalin War kaba la ioh ia ka khusnam Padmashree bad kaba dei ruh ka Head of Department Khasi ha ka skulbah NEHU, kala kyntu ia ki longkmie ba kin mih shakhmat ban wad ia ki lad jingiarap haba ki mad ia kano kanao ka jingshah ban bein ha ka jingim ka jongki bad kumjuh ruh ki longkmie kiba lah ban ai jingiarap kidei ban mih lang shakhmat ban ai jingiarap khnang ba kan wanrah ia ka jingkylla ha ka imlang sahlang.

 Ha kane ka jingialang la don ryngkat ki dkhot jong ka MSCW, ki longkmie ki nongialam shnong bad kiwei kiwei kiba la shah khot sngewbha.