Napdeng ki Seng Sain pyrthei ha ka jylla, ka Voice of the People Party (VPP) ka dei kawei ka seng ba pahuh bha ki riewstad kot ne ki doctor.Hadien ka jingkhlad kyndit u Dr Ricky. AJ. Syngkon, mynta ka VPP ka la sei biang sa uwei u Doktor kot, ban iakhun ia ka ilekshon shiteng samoi sha ka Lok Sabha bad uta udei u Dr. Batskhem Myrboh uba dei u nonghikai ha ka skulbah NEHU. Kum ban shu kdew ha ka Lah sngi u Blei, ka Election Committee ka VPP ka la tyrwa ia ka kyrteng jong u Dr. Batskhem ban iakhun ia ka ilekshon MP Lok Sabha shiteng samoi na Shillong Parliamentary konstiwensi. Haba kren sha ki lad pathai khubor, u Dr. Batskhem ula pynpaw ba u long uba kloi ban pdiang ia ka jingtyrwa, lada ka party ka ibit ia u ban long u kyrtong ban iakhun ia kane ka ilekshon MP Shiteng samoi.“Haba ka party ka la ibit ia nga ban shim ia kane ka bynta ngi hap ban pyndem hi ha ka jingbthah jong ka party,” ong u Dr. Batskhem.
Ula ong ba kane ka dei ka jingkit kaba khia kaba na ka liang ka party kaba ka hap ban shim hadien ka jingduh noh ia u Dr. Ricky Syngkon.U Dr. Batskhem ula ong, “Kum ka party la dei ma nga ne mano mano ki ban mih bujli ia i Dr. Syngkon, kawei nga kwah ban ong ka long ba ngi hap ban pyntyllun ia kaei kaba ngi la dep ban kular sha ki paidbah ha u snem 2024. Kum ka party ngi hap bud dien ia kiei kiba la don ha ka mat treikam jong ka party.”Ula ong ba kane ka ilekshon, kin hap ban iakhun tyngeh bad kyrmen ba kin jop ia kane ka ilekshon da ka jingkyrshan jong ki paidbah.Ha kajuh ka por, u Dr Batskhem uba dei u nonghikai ka skulbah NEHU, ula pynpaw u ieit bad sngewtynnad ia ka kam hiai, hynrei haba peit ia ka kam shakri paidbah ka long ka kam kaba donkam.
“Hoid ka kam hikai ruh ka dei ka kam kaba nga sngewtynnad bha hynrei haba peit ia ka kam shakri paidbah ruh ka long kaba donkam bha. Ngan peit kumno ba ngan ialeh ban pynbiang ia kine artylli,” ula ong. Shuh shuh u Dr. Batskhem ula ong ba ba katkum ka kyndon jong ka skulbah NEHU bad katkum ka jingai jingmut jong ka Parliamentary Committee halor kane, ki nonghikai jong ka skubah (University) ki don ia ka lad bad ki lah ruh ban hikai, wat haba long MP ruh.