Pyndam ka KSU ia ka jingthoh ‘KHALERIAT’

Ka Khasi Students Union (KSU) Jowai Circle hynne ka sngi ka la leit ban pyndam noh shi syndon ia ka kyrteng shnong ba la thoh bakla ha ka Signboard jong ka National Highways Authority of India (NHAI) ha Soomer lad Bypass Jowai WJHD kaba la thoh ‘KHALERIAT’.Ka seng ka la dawa ba ka NHAI hapoh shi bnai kadei ban pynbeit mardor ia ka jingbakla spel dak ha ka Signboard, ki digital platform bad ha baroh ki kot ki sla namar kane ka jingbakla kan wanrah ka jingduh ia ka burom ba khraw jong ka Shnong Khliehriat.Ha ka kyrwoh khubor, ka seng ka la ong ba kane kam dei ka sien ba nyngkong ba kum kine ki jingbakla ki la jia hynrei la jia bunsien wat haka shnong Khliehriat ruh.

Ka seng hapoh ka jingialam u Ewanmi Phawa President Jowai Circle ryngkat ka jingsynran lang ki dkhot, mar ia iohpdiang ia ka jingujor mar mar ka la leit ban phah pyndam noh wut wut ia kane ka jingbakla ba la thoh ha katei ka Signboard.Katkum ka kyrwoh khubor, ka seng ka la pynpaw ruh ka jinglyngngoh namar hynne ka sngi ki dkhot ka seng ki lah leit kynduh ia ki bor pyniaid ka NHAI. Hynrei kajubab ba ki iohpdiang ka long “Nngi shu wan khrong khajna shane, dep nangta nga la leit phai bad ngim tip ia kata ka jingbakla ne bym bakla.” La ong ba kane ka jubab, ka la pynbitar ia ka seng bad shim ba kane ka jingleh dei kaba leh khnang.

Na ka liang ka seng ka la kyntu ia ka Shnong Khliehriat ban ujor da ka ejahar pyrshah ia ka NHAI. Ha kajuh ka por, ka seng ka maham ruh ia ki dukan, ki ophis, bad ia kiwei kiwei ba kin thoh shai ia ka kyrteng shnong da kaba beit bad lada lap ia kino kino kiba leh bakla yn sa pynshitom iaki katkum ki kyndon ain.