U Bah Shemborlang Rynjah kum u CEM, Chairman bah Strong Pillar Kharjana

Ka seng Voice of the People Party (VPP) ka la rai ban thaw ia ka Executive Committee kaba rit ha Khasi Hills Autonomous District Council (KHADC) ka ban don tang 10 ngut kynthup u Chairman bad Vice Chairman. Haba kren sha ki lad pathai khubor hadien ba la wai ka jingialang, u President ka VPP u bah Ardent Miller Basaiawmoit, ula ong ba ka party ka la rai ban bynshet ia ka kam Chief Executive Member (CEM) ha KHADC ha u MDC ka party uba jop na Lyngkyrdem-Laitkroh konstitwensi u bah Shemborlang Rynjah. U bah Ardent ula ong ba ha kane ka Executive Committee yn don tang 8 ngut kynthup ia u Chairman u bah Strong Pillar Kharjana, u Vice Chairman bah Kynjohlang Rangtong, CEM bah Shemborlang Rynjah, nalor ki  7 ngut ki Executive Member kiba kynthup ia bah Powell Sohkhlet, bah Seiborlang Warbah, bah Isnei Hinge, bah Pynkhrawboklin Kharjahrin, kong Aibandaplin L. Nonglait, kong Deiti Majaw bad bah Winston Tony Lyngdoh.

U bah Ardent ula ong ba ka daw ba ka VPP ka pynduna ban thung EM ka dei namar ba kam kwah ban pynsyrwa kai ia ka pisa jong u paidbah kumba ka la ju kren ha ka por ilekshon hynrei kan leh ruh da ki kam.“Ka VPP kan nym kren tang da ka ktien hynrei kan leh ruh da ki kam haba u paidbah u la ai ka jingshaniah,” ong u nongialam ka VPP. Ha kajuh ka por, ula ong khnang ban pyntikna ba ka Council kan iaid khlem kynduh jingeh ha ka pla mang tyngka, ka party ka la shim nyngkong eh ia kane ka sienjam.

“Kane ka EC ba thymmai hapoh ka jingialam ka VPP kan peit bad kan pyndonkam ia ka lynti ba dei kumno ban pynbeit ia ki kynrum kynram, watla ka dei ban shim ia kano kano ka sienjam ba eh pyrshah ia kiba pyndonkam ia ka bor ne ka pisa tyngka ha ka Council,”ong nongialam ka VPP u bah Ardent. Ka VPP kaba jop 17 ngut ha ka iing dorbar kaba 30 ngut, ka la lah ban thaw ia ka Executive Committee marwei khlem da donkam shuh ia ka jingkyrshan na kiwei ki MDC.

Leave a Reply

Your email address will not be published. Required fields are marked *