U dei u dak jong ka jingsah jingkynmaw, u dak jong ka jingshlur jong ki samla ka Jylla

Ka samla Rifiness Warjri hynne ka sngi kala aiti ïa uwei u maw ba la lum na kliar jong u lum ba jrong tam haka pyrthei u Mt Everest shaka tnat Directorate of Mineral Resources ka Sorkar Jylla. Ïa u maw barit, ka samla Rifiness kala lum haka por ba ioh ka lad ban kiew shakliar u lum Everest bad kala aiti ha u Director ka tnat Directorate of Mineral Resources ka Sorkar Jylla u Bah Mardondor Tongper. Lah ban kdew baka samla Rifiness kadei kaba saw bad kaba dang khynnah tam napoh Meghalaya ka ban poi shakliar jong u lum ba jrong tam haka pyrthei u Mt Everest. Ïa une u maw bala wanrah na kliar u lum Everest yn pyni paidbah ha phyllaw jong ka Ophis ka tnat Directorate of Mineral Resources kum ka dak ban pynshlur bad ban ai mynsiem ïa ki nongwan jngohkai, ki samla pule, bad ki nongkiew lum kiba kwah ban kiew lum.

Hashuwa ka samla Rifiness, 3 ngut kiwei pat na Meghalaya kiba la poi sha kliar u lum ba jrong tam haka pyrthei u Mt Everest ki kynthup Gary Jarman Lamare ha u snem 2012, Wansuk Myrthong ha u snem 2013 bad Dolyne Kharbhih ha u snem 2016.Haba pdiang sngewbha ïa une u maw, u Bah Mardondor Tongper “Une u maw um dei tang u bynta jong u lum ba jrong tam ha pyrthei hynrei udei u dak jong ka jingsah jingkynmaw, u dak jong ka jingshlur jong ki samla ka Jylla Meghalaya namar lada don ka thong, ngin poi beit shaka jingjop. Ngin pynneh pynsah ïa une u maw”. Naka liang ka samla Rifiness kala ong “Nga wanrah ïa une u maw na kliar u lum Everest ban siew kylliang iaka Jylla khnang ba une u maw un long kum ka dak ban pynshlur pat sa ïa kiwei ki samla kiba don iaka thong”.

“Nga kwah ban ieh ïa une u maw kum ka dak ban pynkynmaw ïa ki samla jong ka Jylla jong ngi ba lada ngi don ka thong, ngi poi beit shaka jingop” la ong ka samla Rifiness. Ha kane ka sngi naka liang u Director ka tnat Directorate of Mineral Resources ka Sorkar Jylla u Bah Mardondor Tongper bad ki nongtrei jong ka DMR kila pynkupburom iaka samla Rifiness ban ai mynsiem iaka ban nang kiew shaphrang ha kiwei pat ki thong baka don.