“U Sohtrun, Sohniamtra na Meghalaya lah ban ioh ha ki iew ha Europe bad UAE”

U Myntri Rangbah ka jylla u Conrad K Sangma ha ka jingialang rakhe dap 50 snem ka Indian Council for Agricultural Research (ICAR) Umiam, Ri-Bhoi district, ula ong ba ka jylla Meghalaya ka dei ka ktem jong ka rep ka riang bad donkam ban kyntiew ia kane ka kam khnang ban kyntiew ruh ia ka ioh ka kot ha ka jylla. Haba kren ha kane ka jingialang u Conrad ula ong ban kyntiew ia ka kam rep kam riang donkam ban ai ka jingkyrshan ia ki nongrep bad donkam ban wanrah da ki buit stad katkum kane ka juk. U la iathuh ba ka thaiñ ka pynmih ïa ki mar rep ba bun jait ban shalan sha ki ri bad nongbah bapher.

Hynrei namar ka jingbym don ki jaka buh ba biang kim shym la lah ban shalan shabar ri. Wat hapdeng kine ki jingeh, bun ki mar na Meghalaya ki lah ban ioh na ki iew ha Europe bad UAE, khamtam ki sohtrun, sohniamtra, u sying bad u shynrai. U Myntri rangbah ula ai khublei ia ka jingnoh synniang ka ICAR ha ka kam rep bad ula kyntu ba kan nang aiti kham bun ban ai ka jingkyrshan ia ki nongrep ha ki 50 snem ban sa wan. “Ka Meghalaya bad ka North East ka long kum ka ktem ka rep ka riang, ha ka rep soh rep pai, rep syntiew, rep phan rep kba bad kiwei”, la ong u Conrad.

U Myntri Rangbah ula kdew ia ka jingdonkam ka jingiatreilang hapdeng ki jylla kane ka thain shatei lammihngi ka India ban kyntiew ia ka jingpynmih siej. Ula bynrap,“Donkam ban wanrah ia ki buit stad bad ki jingdonkam jong ki nongrep ban pyniadei shabar ban pyniaid iew ia ki mar ki mata khnang ba kin heh ka jingioh.”