Kam don ka jingthmu lehniam, ka dei tang ka jingkyrkhu, ong u Rakkham

U Myntri ka tnad pule puthi ka jylla u Rakkam A Sangma ula kyntait ba ka sorkar ka thmu ban pyllong ka jinglehniam ha ka sngi plie ia ka skulbah Capt. WA Sangma. U Myntri ka tnad Pule puthi ka jylla, u la ong ba ha katei ka sngi, kan dei ka jingialang bad ka sorkar kan shu pyllong ka jingkyrkhu ym ban pyllong kum ka jingleh niam bad kam don eiei kaba bakla. “Ha ka jingplie ia ka skulbah Capt. WA Sangma State University ka dei ka jingialang kaba pyllong ka sorkar bad kam don kano kano ka jingthmu ban leh niam hynrei ka dei tang ka jingkyrkhu,” ula ong.

Kane ka jingkren u myntri ka long hadien ba ka la mih ka jingpyrshah halor ka jingkren jong u dang shen, ba yn pyllong ia ka jingleh niam Khristan ha ka por ba plie ia kane ka skulbah kaban long ha ka 13 tarik mynta u bnai. Ha katei ka sngi ba plie, yn khot ia baroh naduh ki  nongialam Balang, kumjuh na kiwei ki jait niam ruh bad ula kyntait ba ka sorkar ka thmu ban pyllong ka jingleh niam katkum ka rukom ka jingngeit ki Khristan.

 “Kam don eiei kaba bakla ban pan ka jingkyrkhu bad kam dei ba thmu ban pyllong kum ka jingleh niam. Ha ka jingplie la khot lang ia baroh naduh ki nongialam niam na ki kynhun bapher bapher ruh namar ba ka dei ka prokram sorkar. Ngam shym la ong ban leh niam Khristan hynrei ka dei ka jingbatai bakla ia ka jingkren jong nga”, la ong u Rakkam. Ha ka jingplie ia kane ka skulbah, yn don lang u Myntri Rangbah u Conrad K Sangma, u symbud myntri rangbah u bah Sniawbhalag, u Speaker u Thomas A Sangma nalor u myntri ka tnad pule puthi bad kiwei.