Ujor ka JNC ba ieh lyngkrang khlem jingker ia ki Transformer

Ka Jaiñtia National Council JNC Jalaphet Circle hapoh ka jingialam u General Secretary jong ka u Giken Langstang kila leit  iakynduh markhmat bad u EE ka MePDCL Khliehriat Division u bah Micheal Pohshna ha ryngkat ki jingthoh halor ka jingieh lyngkrang khlem ker sawdong iaki transformer kiba don hapoh ka Shnong Jalaphet. Ki jaka ba khlem ker sawdong iaki transformer kynthup ha Thna Mulait, Urshuni, Lad Shur Shur, Shur Shur bad Lad Narwan. Ka seng ka ong ruh ba kum kine  ki transformer dei kiba donkam bha ban ker  khnang ban teh la kam ia kano kano ka jingjia ba sngewsih khamtam iaki briew, namar bunsien ka jingjia shah ring bording ki briew kumjuh ki mrad ka juh jia khah khah haki jaka nongkyndong kawei nakii dawbah dei na kum kine ki Transformer bala shu ieh lyngkrang ne khlem ker bha daki bor jong ka tnat ba dei peit.

Ha kane ka jingiakynduh ka seng bad u EE, ula pyntip ba kane ka bynta ka hap hapoh ka u SDO, kumta ka seng kala  iakynduh bad u SDO katba ma u pat u ong ba um donbor eiei ban leh da kaba bynrap ruh ba ia kane ka kam hap ban peit daki bor kiba halor kaba mut na Headquarter jong ka jylla. Na ka liang ka seng ka dap daka jingsngew lyngngoh ba kat u SDO um donbor ei ei ban leh halor kane ka kam wat haba ka hap hapoh ka jingpeit jingkhmih jong u ruh. Nalor kitei ki jaka ba ka seng kala leit ai jingthoh, ka ong ba dang bun ki jaka hapoh ka thaiñ kiba iakynduh ia kane ka juh ka jingma khamtam iaki khynnah namar ba khlem ker iaki transformer.

Kumta ka seng ka buh jingmaham ruh ia ka tnat bording khamtam iaka Khliehriat Division ba lada kane ka tnat kam donbor ban teh la kam iaki jingma ba lah bad jia ei ei kaba sngawsih ia u paidbah lyngba kum kine ki transformer, la dei ban khang noh shi syndon iaka tnat treikam namar i kumba ki shu shong rieh tngen ha kine ki jaka khlem da trei hok iaka kam bala bynshet haki.Shuh shuh ka seng kala bynrap  ba kan sa shim da kiwei pat ki sienjam lada kane ka tang kam shimkhia ban ker iaki transformer.