Ai khublei u MLA Jowai ba ioh tih dewiong, yn iakren ruh ia kiba don jaka barit

U Wailadmiki Shylla MLA ka Jowai uba dei ruh u State President ka NPYF, hynne ka sngi ula ai khublei iaka sorkar Jylla bad ruh ia u myntri rangbah duh u Conrad Sangma halor ka jinglah ban plie biang iaka kam tih dewiong hapoh ka Jylla Meghalaya, kaba la shah khang haka NGT  naduh u snem 2014, ba nangne shakhmat yn pyntrei katkum ka juk thymmai ne ka Scientific Mining. U ong ba naduh ba khang ban tih dewiong ki briew ka Rilum Jaiñtia  kiba shaniah haka kam khaii dewiong kila shah ktah bha, hynrei daka jingtrei shitom ka sorkar MDA II ha u 2019 la lah ban pynkynriah ia ka jingkhang tih dewiong da ka Supreme Court.

Bad ka  Supreme Court ruh kala ai jingbit ban tih dewiong biang  tang lyngba daka  juk stad ba mynta ne ka Scientific Mining, bad  naduh katei ka por ka sorkar kala iarap ia kiba don jaka kiba don jingthmu ban tih dewiong ba kin pynbiang iaki kot ki sla. U Wailadmiki ula ai khublei ruh iaka Ministry of Coal kaba la pdiang ne bala ai license  iaki lai tylli ki mining plan hapoh ka jylla da kaba ngeit skem ba kin dang bun shuh shuh ki ban iohbor  tih dewiong.

Halor ka jingdon kiba ud ba nam iaka kyndon ba ailad ban ioh tih dewiong tang kiba don iaki jaka ba heh, katba kiba rit pat ki duh lad ban tih,  u Wailadmiki u ong ba ka sorkar kan sa wad ki  lad ki lynti bad ruh ban iakren bad ka Coal Ministry khnang ba kito ba don ki jaka barit ruh kin ioh biang ban tih ia une u mar pohkhyndew khlem da ktah iaka mariang.