Da ka jingsngewkhia bad duh jingkyrmen halor ka jingtrei torti ia ki ar tylli ki surok ba la mang lyngba ka skhim PMGSY, mynta ka sngi ki nongialam ka Synjuk ki Rangbah Shnong Rud Wah Umpli ki la leit ban buh da ka dorkhas bad ujor ha u Abhilash Baranwal, Deputy Commisioner ka Ri Bhoi District ban dawa shimkhia mardor ban tuklar ia ka jingtrei torti ia kine ki surok.
Katkum ka jingujor jong kane ka Synjuk ki Rangbah Shnong Rud Wah Umpli, la ujor halor ka jingtrei torti ia u surok na Umden sha Byrnihat u ba don kumba 38.7 km ba la pyntrei da ka MP Agarwal Company bad u surok na 20 Mer sha Umdap ba don kumba 5 km ba la pyntrei da u Bah Sunshine Makri, kine ki surok ki dei ruh kiba hap hapoh ka Nongpoh bad Umden Constituency.
Haba kren bad ki Nongthoh Khubor, u Bah Arul Makri kum u Secretary ka Synjuk bad u Bah Anjelus Maring Rangbah Shnong ka Umdapdumu, ki la iathuh, ba kum ka Synjuk hadien ba ka la ioh ia ka jingujor bad ka jingpynsngew na ki paidbah halor ka jingbym hun bad ka jingtrei torti ia kine ki ar tylli ki surok kiba dei shisha u budlum jong ka roi ka par ha katei ka thaiñ kumta kum ka Synjuk ka la buh syndon da ka jingujor ha u DC ba un leh pat ia kaba donkam.
“Katno ngi kum ki paidbah kiba shong basah ha kitei ki thaiñ, ngi dap da ka jingkmen bad ngi da sngewnguh ruh ia ka sorkar jylla kaba la phaikhmat sha ka jingeh ba la mad da ki paidbah nongleit nongwan halor ka jingsniew ba palat liam jong kine ki ar tylli ki surok mynta la kumba 20 snem eiei, hynrei ngi duh jingkyrmen pat ban iohi ba la shu pyntrei ne tei torti pynban ia ki jingtei ia kine ki surok da ka Company bad u Contractor”, pynpaw ki nongialam ka Synjuk ki Rangbah Shnong Rud Wah Umpli.
Ki la pynpaw ruh, ba hashwa ba ki paidbah kin mad biang ia ki jingeh namar ka jingtrei torti ban tei ia kine ki ar tylli ki surok ba la mang na ka skhim PMGSY kumta kum ka Synjuk ka la ujor bad dawa na u DC ban shimkhia mardor bad ruh ban leit jurip hi dalade ha ryngkat ki nongialam ka Synjuk ban lap ia ki jingshisha baroh.