Ka Tnad Animal Husbandry & Veterinary ka Sorkar Meghalaya hynne ka sngi, ka la ai ki jingtip ba bniah ia ka kynhun jong ka National Level Monitoring (NLM) jong ka Sorkar India ha ka jingialang ha ka ophis treikam ka Director ka Tnad Animal Husbandry & Veterinary, Shillong.
Ia kane ka jingialang la pyniaid da ka Dr. A. Chyne kaba long ka Director jong ka Animal Husbandry & Veterinary ha ryngkat ka jingdonlang u Dr. M.D. Sharma (ISS) Deputy Director & Nodal Officer for Central Sector Schemes ryngkat bad ki heh ophisar ka Tnad bad ki nongmihkhmat na ki kynhun bapher.
Ka kynhun jong ka National Level Monitoring kaba kynthup ia u Dr. Mihir Mondal (NLM, DAHD) bad Dr. Mahesh Katara jongka National Level Monitoring kaba la pyniasoh bad ka DAHD kila wan jurip ia ka jylla bad ban khmih bniah ia ka jingpyniaid shakhmat ia ki skhim kiba la pyntreikam da ka tnad lyngba ka jingkyrshan tyngka da ka Sorkar Pdeng.
Ki 4 tylli ki skhim kiba la khmih bniah ki kynthup ia ka Rashtriya Gokul Mission (RGM), National Livestock Mission (NLM), Livestock Health & Disease Control Programme (LHDCP), National Programme for Dairy Development (NPDD) bad kiwei kiwei kiba iadonbynta lang ha kaban kyntiew ia ki jingri lyngba kane ka jingjurip kaba naduh ka 12 tarik haduh ka 16 tarik u Rymphang 2026.
Ka kynhun jong ka NLM kan leit ruh ban jurip ia ki bynta jong ka East Khasi Hills, West Khasi Hills bad West Garo Hills district ban leit jurip bad ban khmih bniah ia ki jaka kiba pyntreikam ia ki projek, ban iakynduh bad ki nongioh jingmyntoi bad ban wad bniah shaphang ka jingai jingmyntoi jong kine ki skhim.
Kane ka jingwan kadei da ka jingthmu ban pynkhlain ia ki bor ban khmih bad peitngor, ban pynthikna ba kan don ka jingkitkhlieh bad ka jingpyntreikam ha ka lynti kaba khuid ba suba bad ban lum ia ki jingpynsngew khnang ba un dang lah ban iai pynbha shuh shuh halor ki prokram kiba iadei bad ka kam ri jingri hapoh ka jylla Meghalaya.