Wan nyngkong ka Meghalaya ha ka Ri ban kynjoh 86 percent ki skul ba lait na u duma

Ka Meghalaya ka long ka Jylla banyngkong eh ha ka ri India ba ki skul kin kynjoh ia ka 86% ban lait na ka jingpyndonkam ia u duma ne Tobacco Free Educational Institutions (ToFEI) kaba dei ka percentage kaba heh tam ban rekod hapoh ka ri.

Une u mawmer u long uba kongsan ia ka jylla, khamtam haba ka jylla ka la don ia ka rekod ia ka jingiap ki 8000 kaba don ia ka jingiadei bad ka jingpyndonkam ia u duma man la ka snem bad 47% ki khynnah kiba don 15 snem ka rta ki pyndonkam ia u duma katkum ka jinglap ka Global Adult Tobacco Survey (2017).Kaba la ithuh ia ka jingdonkam ban pyrkhing ka dei ban sdang noh mardor, ka sorkar Meghalaya ka la sdang ia ka Tobacco Free Educational Institutions (ToFEI) programme 3 snem mynshwa hapoh jong ka National Health Mission.

Ia kane ka prokram la pyntreikam da ka Tnad ka Koit ka Khiah bad ka Tnad Pule Puthi bad ka Sambandh Health Foundation da ka thong ban pynthikna ba baroh ki skul ha ka jylla kin dei kiba lait na ka jingpyndonkam ia u duma.

Hapoh ki kyndon jingbthah ka ToFEI kaba la pynmih da ka Ministry of Health and Family Welfare, Government of India, ki skul ki hap ban pyndep ia ki 9 tylli ki bynta bad ki kam kiba iadei bad ka jingiakhun pyrshah ia u duma ia kaba la ai 100 point bad dei ban ioh la kumno kumno ruh 80 marks. Ki kynthup ia ki kam ban buh iaki jingthoh, ka jingiaid rally bad ka jingbud pyrkhing kaba la pynshisha da ki ophisar ka District bad Block da kaba pyndonkam ia ki kor Digital.

Man la u snem, jan 10,000 ki skul ha kylleng ka jylla Meghalaya ki iashimbynta ha ki rally pyrshah duma, ki jingialap da kaba shim ia ki jingsoi bad ki jingpynsngewthuh paitbah ban pynduh mynsiem ia ki khynnah ban ym ngop ha ki jingkyrni na kaj ingpyndonkam ia u duma.

Kane ka jingjop ka pyni ia ka jingialam kaba khlain bad ka jingiatreilang ka sorkar Meghalaya khamtam eh ka tnad ka koit ka khiah bad ka pule puthi ryngkat bad ki ophisar na ki district, block bad cluster-level kiba la pynthikna ban peitngor, ban pynshisha bad shim ia ka jingkitkhlieh. Ka Jylla kala pdiang ia ka Sambandh Health Foundation’s Digital Program Implementation ban pyntreikam ia katei ka prokram.

“Ban kynjoh sha ka 86 percent ki skul kiba lait na u duma, kam dei tang ka jinglah ban treikam ki bor kiba dei khmih, hynrei kadei ka jingjop ha ka liang ka koit ka khiah jong ki khynnah ki jong ngi” la ong ka State ToFEI Nodal Officer ka Jennyfer Jones Synrem bad une u mawmer ula nang pynjan ia ka jingiohi jngai ka jongi ia ka ‘My Meghalaya, Tobacco‑Free Meghalaya”.

Ka Dr N.D Mawrie, State Nodal Officer ka National Tobacco Control Programme bad ka pynpaw ba 34% na ki khynnah ha ka rta kaba 13–15 ki pyndonkam ia u duma katkum ka Global Youth Tobacco Survey. Ki skul ki saindur ia ki jinglong kaba shi rta jong ki khynnah bad da kaba wanrah ia ka rukom treikam ban tehlakam ia ka jingpyndonkam ia u duma ha ki jaka pule, kumta ka wanrah ia ka jinglong jingman kaba shngain bad iada ia ki pateng ban dang wan na ka jingkyrni bad ki jingpang kiba ioh lyngba u duma.