Wan poi ki hati khlaw ha thain Jirang khappud Meghalaya-Assam

Ka kynhun ki hati khlaw ba don palat 10 tylli ki la pynlong ka jaka sah mynta lajan shibnai ha u lum Wahsieng ha khappud Meghalaya-Assam ha thain Jirang, Ri Bhoi district. Kum ban pynpaw kine ki hati khlaw ki juh wan man u snem ha ka por shwa ban ot kba ha katei ka thain, kaba pynlong ia ki Nongrep pynthor ha Ri thor Assam khappud bad ka Meghalaya ban pynap da ki sainar ilektrik sawdong ki pynthor kba ban iada na ka jingshah pynjulor ha ki hati khlaw ia u kba, hynrei mynta u snem kitei ki hati la wan poi kloi bad ki nongrep ki hap ban ap miet man ka sngi ha pynthor ioh wan ki hati ban pynjulor ia u kba ba ki la trei shitom baroh shisnem. Ka khubor ka iathuh ba hynne ka miet ka kynhun ki hati ba don kumba 9 tylli ki la pynjulor ia ka pynthor kba ha shnong Bikrampur hajan Burihat, Assam bad u trai ba ap pahara ula hap ban phet rieh ba don marwei ba tieng ia kitei ki hati khlaw. La iathuh kane ka kynhun ki hati ka hiar mynmiet sha Assam katba mynmiet ki wan sah ha lum Wahsieng ban lait na ki jingma ioh don kiba dusmon.
U nongthoh khubor dang shen ula lap ia katei ka kynhun hati khlaw kumba san haduh phra tylli harud surok ha Nalapara, ha ka por janmiet kiba dang hiar na Lum Wahsieng sha ri thor Assam don. Ka jingwan tur ki hati khlaw ha ki jaka rep bad ki shnong ka lah ban long ba kim ioh bam shuh ha khlaw kum ha ki por mynshwa bad mynta kine ki hati kim tieng bad ki iaid ha surok mynsngi mynshai kaba long ka jingma ia ki paidbah nongleit nongwan ha katei ka thain.Ka jingwan Lah ban pynpaw ba kane ka jingwan tur ki hati khlaw ka lah ban long ba kim ioh bam shuh ne ki jaka sah ha khlaw kumba long mynshwa bad ki iaid mynsngi mynshai wat ha ki surok kaba long ka jingma ia ki paidbah nongleit Nongwan ha katei ka thain.
Kum ban pynpaw ha ki 40 snem mynshwa u Lum Wahsieng ba don ha Assam khappud bad ka Meghalaya, Ri Bhoi District bad utei u lum u long kum ka jaka sah ki mrad khlaw ha katei ka thain, namar u hap hapoh ka Reserve Forest ka sorkar Assam bad ki briew mynhswa kim ju leit ha utei u lum, kumta ki mrad khlaw kynthup ki hati, ki sier, skei, khniat, ki muid khlaw, masi prut bad kiwei ki pynlong kum ka jaka sah. Hynrei hadien na ka jingpom dieng ki nongkhaii tuh na katei ka khlaw ka pynlong ia ki mrad ban jah rngai bad duh jait baroh bad ki hati ki pynlong kum ka jaka sah shipor ban wan bam kba ha ki pynthor bad lyngkha ha Assam bad Meghalaya shwa ban ot kba u Naiwieng bad Nohprah.