Wanrah u CM ia ka kaiphot bthei bom Thangsko

U Myntri Rangbah ka jylla u Conrad K. Sangma hynne ka sngi ha Iing Dorbar Thawain, ula wanrah ia ka kaiphod halor ka jingbthei ka krem tih dewiong beain ha Mynsngat, Thangsko East Jaintia Hills. U Conrad ula pyntip ba katkum ka kaiphod haduh mynta ka sngi ka 16 tarik, Rymphang, ki briew kiba iap ha kane ka jingjia ki don 33 ngut baroh bad ka sorkar ka la ai jingiarap T.24 lak sha kiba ba haiing jong ki 8 ngut kiba la khlad bad ka sorkar ka dang pynbiang ia ki jingdonkam ban pyllait pisa jingiarap sa sha kiwei ki longiing ki bym pat ioh pdiang ia ka jingiarap.

U la iathuh ruh ba haduh ka 14 tarik Rymphang ka sorkar ka la ioh ban kurup haduh 15,224.72 metric ton u dewiong na katei ka jaka tih dewiong beain. U Myntri Rangbah ula pyntip ruh ba ka kynhun tohkit ba kyrpang ka Special Investigation Team (SIT)  ba la thaw da ka Director General of Police (DGP) ka jylla la khlieh da u DIG, Eastern Range ryngkat u Superintendent of Police (SP) bad kiwei ki heh pulit ban tohkit ia kane ka jingjia. Ula iathuh ba la kem 7 ngut ki briew kiba donkti ha ka jingpynbthei ia ka krem dewiong beain bad 7 ngut la kem ha shwa katei ka jingjia kiba iadei bad ka kam tih dewiong beain. Ula iathuh ruh ba ki bor sorkar kila hiar sha katei ka jaka ha kaba ka la kurup ia ki tiar ba pyndonkam ban tih beain ia u dewiong bad la pyntip ba kane ka jingjia ka dei na ka jingpynbthei da u dynamite ha katei ka par dewiong beain.

Shuh shuh ula pyntip ruh ba ka sorkar ka la phah 5 kynhun ki pulit ban pyllong ka jingkhynra, 8 ngut ki Additional Sub-Inspector bad 4 Platoon ki kynhun Battalion, nalor ki majistor bad ki ophisar.Shuh shuh ula iathuh ruh ba haduh mynta 62 tylli ki ejahar kiba la ujor halor kane ka jingjia ha Thangsko ha kaba 57 tylli la ujor hadien ka jingjia bad 5 tylli shwa ka jingjia ha Thangsko. Halor ka Judicial Inquiry Commission, u Myntri Rangbah ula ong ba ia kane ka Commission yn khlieh da u Nongbishar barim ka Uttarkand High Court u Justice RS Chauhan ryngkat arngut ki dkhot kiba kynthup ia u bah H. Nongpluh uba dei u IPS ba la shongthait bad u bah PS. Dkhar uba dei u IAS ba la shong thait ban tohkit bniah halor kane ka jingjia bad la aipor 6 bnai ia ka Commission ba kan aiti ia ka kaiphod jingtohkit.