Wat la ka don ka jingbyrngem ka HNLC, ka Council kam pat pan bor pahara:CEM

U Chief Executive Member (CEM) ka Khasi Hills Autonomous District Council (KHADC) u Bah Winston Tony Lyngdoh hynne ka sngi ula ong, wat hapdeng ka jingbyrngem ka seng kieng atiar ka Hynniewtrep National Liberation Council (HNLC), ka Council ka trei beit ia la ka kam kumba la bynshet. Haba kren sha ki lad pathai u CEM ula pynshai ba ka Council ka la shim ia ka sienjam ban long kiba phikir bad adkar ha ophis treikam.

U CEM ula pynshai haduh mynta ka District Council kam pat shym la ujor ejahar (FIR) halor ka jingshah byrngem ha ka sengkieng atiar ka HNLC. Ula pynpaw ka Sorkar Jylla ka dang sngap mian-mian beit halor kane ka kam, bad wat ki Pulit ruh kim pat shym la wan ban iakynduh ia ki nongmihkhmat ka Council halor ka jingshah byrngem.  “Wat la ka don ka jingbyrngem, ka Council kam sngew dei ban pan bor pahara kyrpang na ka Sorkar ne ka tnat pulit. Katba ngi dang pyrshang ban trei ia ki kam ha ka lynti kaba biang, ngam sngew dei ban poi shaduh uta u pud ban pan bor pahara” la ong u Bah Winston.

U Bah Winston ula pyntikna ba ka leit ka wan bad ka jingtreikam ha District Council ka dang iaid beit kumba ju long, khlem kano kano ka jingsyier ne jingsheptieng.”Ngi iaid ngi ieng khlem ka jingsyier, hynrei ngi long kiba adkar bad peitngor. Haduh mynta kam don kano kano ka jingtyrwa na ka Sorkar ne ki pulit ban pahara ia ngi” u la ong.