Shah ktah 79 ki kolej na ki jingjia ha NEHU

Ka Sorkar Jylla hynne ka sngi ka la kyntu ia u Pro Vice Chancellor ka skulbah NEHU u Prof. S Umdor ban wan phai biang sha ka kam ban iaid beit ki kam hapoh ka skulbah. Lah ban kdew ha ka 15 tarik Nohprah 2025, u Pro Vice Chancellor ka skulbah NEHU u Prof S Umdor ula aiti noh ia ka shithi iehkam kum u Pro VC ka skulbah. Haba kren shaki lad pathai khubor u Myntri ka tnat Pule Puthi u Bah Lahkmen Rymbui ula ong,  ka jingbym nongialam hapoh ka skulbah NEHU ka la ktah ym tang ia ka NEHU hynrei ïa palat 70 tylli ki College ba iasoh bad kane ka skulbah. U Bah Lahkmen u la ïathuh ba kane kala ktah iaki kam hapoh ka skulbah NEHU khamtam haba iadei bad ki kam ban pynïaid iaki eksamin, ka thungkam thungjam bad ka jingmang pisa ban pyntrei ia ki kam bad ban siew tulop ia ki nongtrei jong ka skulbah.

“Nga kyntu ïa u Prof S Umdor ban shimti biang kum u Pro VC ka NEHU namar haduh mynta ka skulbah kam pat pdiang ia ka shithi iehnoh kam jong u. Ka jingwan phai biang u Prof S Umdor kan pynthikna ba ki kam ki iaid beit hapoh ka skulbah” la ong u Bah Lahkmen. U Myntri ula ïathuh na ka liang ka Sorkar Meghalaya ha ka jingïalam u Myntri Rangbah ka Jylla ka la shim ki sienjam ban ïakren bad ka tnat Ministry of Education ka Sorkar Pdeng ban pynbeit ia ki jingeh ka NEHU ka iakynduh haduh kine ki por. 

U la ïathuh kum u Myntri ka tnat Pule Puthi ula ïakren bad baroh ki kynhun hapoh ka NEHU kumjuh bad ka Sorkar Pdeng. “Hynrei namar ia ka shithi iehnoh kam u Prof S Umdor kum u Pro ka NEHU ym pat pdiang, nga kyntu ba un wanphai biang ban pyniaid ia ki kam hapoh ka NEHU” u la ong.“Katba ngi dang ap ia ka rai jong ka Ministry of Education ka Sorkar Pdeng kan bha shibun ïa u Prof S Umdor ban shimti biang kum u Pro VC na ka bynta ka bha ka miat ka NEHU bad ki samla pule” u la bynrap.