Wat peit ia ki projek na ka mang tyngka, peit ia ka jingdonkam ki paidbah

U Myntri Rangbah ka jylla u Conrad K. Sangma ula ong, ia ka jingkordor jong ka Projek ym dei ban bishar da ka jingbhah tyngka ia ka hynrei ia ka jingktah ia ka jingim ki briew. U Conrad ula kren ia katei hynne ka sngi, ha ka jingplie ia ka Hubert Rosario Road ha Spein ha Mookaswan, ka surok ka ban mih sha Hubert Acupressure Centre bad ia kane ka surok kaba la shna thymmai ha West Jaintia Hills ka long kumba 1.13 km bad la shna ha ka jinglut kaba kot T.1.93 Klur. “Kane ka surok ka lah ban dei ka projek kaba T.1.93 Klur ha ka jingmang tyngka hynrei ia nga hi, ka long ka bym don dor ha ka rukom ba ka ktah pat ia ka jingim khamtam eh ia kito kiba pang, kiba leit wad ia ka jingsumar bad ia ki Sister kiba trei met bad mynsiem ban ai jingsumar” ong u Conrad haba kren ha ka jingialang.

“Watla tang T.659 Klur kadei ia ki projek shna surok kiba la mang hapdeng u snem 1991 haduh u 2018, hynrei ha kine ki 7 snem kiba la dep la mang haduh T.4,000 Klur. Kumba 70% jong baroh ki surok kiba la shna lyngba ka Pradhan Mantri Gram Sadak Yojana (PMGSY) ha ka jylla kidei kiba la shna pyndep ha kine ki snem” la ong u Myntri Rangbah. Ula ong, ba ka Meghalaya kala sdang ban long kum kawei na ki jylla kaba la ialam ha ka jingbei tyngka ha ka liang ka koit ka khiah, ha kaba palat 8% jong ka mang tyngka kaba shi snem jong ka jylla, palat ia ka T.1,000 Klur kadei kaba la bei ha ka liang ka koit ka khiah bad ka sorkar ym tang ba ka kyrshan ia ki hospital sorkar hynrei kala iatreilang ruh bad ki hospital kiba la pyniaid da ki Balang. Ula pyntip ruh ba ka Rural Health Center kum ka Hubert Acupressure Centre kadei kaba la pynkhreh mynta ban kynthup noh ha ka wat kaban sa wan ban ioh ia ka Grant na ka sorkar jylla.

Ula pyntip ruh, ba ka sorkar kala shim ia ka rai ban kyrshan ia ka jingai jingsumar tynrai kiba don ha kylleng jong ka jylla, ban pyniar ia ka jingnang jingstad tynrai ha kaba iadei bad ka rukom ai jingsumar ka jongki. Katba u Symbud Myntri Rangbah ka jylla u Bah Sniawbhalang Dhar, ula iaroh ia ka shnong ka thaw halor ka jingiatylli ka jongki bad ula pynpaw ia ka jingsngewsarong ban iadonbyntalang bad ka thain Mookaswan bad ula iaroh ruh ia ka jingtrei met bad mynsiem ki Sister ha kaba iadei bad ka jingai jingsumar. Ha kane ka jingialang la iadonlang u Archbishop Victor Lyngdoh jongka Shillong Diocese, u Bishop Ferdinand Dkhar jongka Jowai Diocese, u MLA ka Jowai u Bah Wailadmiki Shylla, ki heh ophisar na ka tnad Public Works Department bad ki nongialam shnong bad kiwei kiwei.