klur ai ka sorkar sha ka Dr. Norman Tunnel Hospital Jowai

U Myntri Rangbah ka jylla u Conrad K. Sangma hynne ka sngi ula ai T.2 Klur sha ka Dr. Norman Tunnel Hospital ha Jowai lyngba ka Meghalaya Healthcare Advancement Policy (MHAP). Ia kaba dang sah sa T.1 Klur yn sa pyllait hadien ba la ai Utilization Certificate (UC) hadien ba la dep pyndonkam ka pisa ba T.1 Klur kaba la ioh pdiang ha ka wat kaba nyngkong. Hapoh jong kane ka skhim la ai T.10 Klur ia ki 5 tylli ki Hospital kiba la pyniaid da ki kynhun Balang jong ka jylla. U Myntri Rangbah ka jylla ula ong, ba ka sorkar ka iengskhem ha kaban don ia ka jingiatreilang kaban neh slem bad ki hospital kiba don ia ka mishon.

“Kane kam dei satia ka jingai jingiarap kaba tang shisien hynrei kadei tang ka jingsdang ia kaba yn pynneh shi rta ia ka jingiatreilang. Ka skhim ka long kaba iar, ki hospital ki lah ban shim hi ia ka rai kumno ban pyndonkam ia ka pisa katkum ka jingsngew ka jongki ha kano ka bynta kaba kongsan tam ban pyndonkam ia katei ka pisa” la ong u Conrad haba kren ha ka jingialang. Ula pynbna ruh ia ka jingthmu ban pynlong ia ka State Level Healthcare Conference ban tei ia ka jingiatreilang hapdeng ka sorkar, ki jaka sumar kiba pyniaid da ki mishoneri bad baroh kiba don bynta lang ha ka koit ka khiah. Ula pyntip ruh ba ka jylla kala lah ban pynduna da 45% ia ka jingkhlad jong ki longkmie kiba pun khun ha kaba iadei bad ka National Average bad kane kala seisoh kadei eh namar ki sienjam kum ka CM Safe Motherhood Scheme, kaba pynthikna ban khmih bniah ia man la ki longkmie kiba pun khun kiba don ha kylleng ki bynta ka jylla Meghalaya.

Ula ong, ba ka sorkar kala pyndonkam ia ki kor teknoloji bad buddien bad ka khmih bniah ia ka rukom pun khun kiba don hapdeng ka jingma bad ban shimkhia mardor ha ka por kaba biang. Ia katei ka jingialang la pyniaid da u Rev. S. Lamare, uba la pynpaw ia ka jingsngewnguh ia ka jingai jingkyrshan bad ia ka jingbteng ban ai jingiarap na ka bynta ki jingtei bad halor ka jingpule Nurse.