Wat tieng la pynkhreh ki lad iada na ki jingma ym tang u Covid: Ampareen Lyngdoh

Ka Myntri ka koit ka khiah ka Kong Ampareen Lyngdoh hynne ka sngi ka la ong, ka jylla ka la pynkhreh ia ki kor ki bor ban ïakhun pyrshah ïa kino kino ki jingma ym tang u Covid-19 hynrei ia kiwei pat ki jait jingpang. Haba ïakren sha ki lad pathai khubor ka Kong Ampareen ka la ong, “Tang ha ka taiew ba la dep, ngi la ïakren online bad u Myntri ka tnat koit ka khiah jong ka Sorkar Pdeng bad ngi la pynthikna ïa ka Sorkar India ba ka jylla Meghalaya ka long kaba la pynkhreh.”

Haba kyntu ïa ki nongshong shnong ba kim dei ban sheptieng, ka Myntri kala ong “Ka Covid kaba ngi kynmaw baroh ha u snem 2019-2020 ka dei ka jinglong kaba la lynshop ïa baroh ki jaitbynriew, baroh ki ri, baroh ki jylla hynrei mynta kiei kiei kim long kumta. Ka khlam Covid mynta kadei ba lah ban ïakhun da ki mashin jong ka tnat ka koit ka khiah ha ki jylla bapher bapher jong ka ri.” “Wat pynmih ïa ka jingtieng kaba ym donkam bad kumba ngi la ong pyndonkam ïa baroh ki kyndon covid lada don kino kino ki nongshong shnong kiba don kano kano ka jingsngewtynnat ne ki dang ïohi ïa kino kino ki dak jingpang covid, pynkyrpang ïalade, shim dawai ha ka por, baroh ki kyndon covid dei ban bud bad ngin sa lah ban pynïaid ïa ka jinglong jingman ryngkat bad ki mashin jong ka sorkar jylla,” ka la bynrap.

Haba kylli, ka Myntri la ong, “Ka jingtest ne ka jingbym test ki nongshong shnong jong kane ka juk mynta ki la tip bha ia ki kyndon covid. Lada phi don ka jingartatien bad lada ki dak jingpang jong phi kim jah noh tang hapoh khyndiat sngi kum ha ki 72 kynta ne palat phi tip bha ia kaei kaba dei ban leh. Ngim donkam ban pyntip ia ki jingbthah jong ngi bad ngam ngeit ba ngi dei ban thaw ia ka jingtieng jong ki nongshong shnong.”